Thursday, 12 November 2009 15:04 ဗထူး
တပ်မတော်အတွင်း ၂၀၁၀ ရွေးကောက်ပွဲ ကျင်းပမည့်အချိန် သတင်းအမျိုးမျိုး ထွက်ပေါ်နေကြောင်း အမည်မဖော်လိုသည့် တပ်မတော်အရာရှိတဦးက ပြောသည်။
လာမည့် ၂၀၁၀ ရွေးကောက်ပွဲကို မတ်လ၊ မေလနှင့် နိုဝင်ဘာလတို့တွင် ကျင်းပမည်ဖြစ်ကြောင်း သတင်းများ ထွက်ပေါ်နေခြင်းဖြစ်သည်။
“အခုဟာက တပ်ထဲမှာက သတင်းတွေက အမျိုးမျိုး ကြားနေတာ။ အဲဒီသုံးလထဲက တလလမှာ လုပ်မယ်။ တိတိကျကျတော့ မပြောနိုင်သေးဘူး” ဟု အဆိုပါအရာရှိက ဆက်ပြောသည်။
ထို့အပြင် တပ်မတော်သား မိသားစုဝင်များ၏ စားဝတ်နေရေးအခြေအနေမှာလည်း ကြပ်တည်းမှုများရှိနေကြောင်း ယင်းအရာရှိက ဆက်ပြောသည်။
“တပ်ထဲက အခြေအနေကတော့ ယောင်္ကျားဖြစ်သူက ရှေ့တမ်းသွားတယ်ဆိုရင် ရိက္ခာက သူတို့နဲ့ပါသွားတော့ နောက်တမ်းမှာ ကျန်ခဲ့တဲ့ မိန်းမက မွေးဖွားခါနီး တပ်ထောက်ပံ့ရေးက ၅၀၀ ပဲ ထောက်ပံ့တယ်။ မလောက်ရင် တပ်ရေးဗိုလ်ကြီးတွေ၊ တပ်ရင်းမှူးကတော်တွေဆီက အတိုးနဲ့ချေးပြီး နေရတာ” ဟု ပြောသည်။
ယင်းကဲ့သို့ ချေးငွေများကို လစာထဲမှာ ပြန်ဖြတ်သည့်အခါ အတိုးပါ ဖြတ်တောက်သဖြင့် တပ်မတော်သား မိသားစုဝင်များအနေဖြင့် အကြပ်အတည်းမှာ တနေ့ထက်တနေ့ ဆိုးရွားနေသည်ဟု ၎င်းအရာရှိက ဆက်ပြောသည်။
၂၀၁၀ ရွေးကောက်ပွဲ နီးလာသည်နှင့်အမျှ တပ်မတော်သားများအနေဖြင့် အကြပ်အတည်းမျိုးစုံ ကြုံတွေ့နေရပြီး အချို့အရာရှိ တပ်မှူးများကိုလည်း အရပ်ဘက်သို့ ပြောင်းရွှေ့ခြင်းများလည်း ပြုလုပ်နေလျှက်ရှိသည်။
No comments:
Post a Comment