ဖေဖေါ်ဝါရီလ(၁၂)ရက်နေ့သည်မြန်မာပြည်လွတ်လပ်ရေးရရှိရေးအတွက် ပြည်မတောင်တန်းပူးပေါင်း ရေးအထိမ်းးအမှတ် ပင်လုံစာချုပ်ချုပ်ဆိုခဲ့သည့် သမိုင်းဝင်နေ့တနေ့ဖြစ်ပါသည်။ ဗိုလ်ချုပ်အောင်ဆန်းနဲ့တကွ တိုင်းရင်းသားခေါင်းဆောင်များသည် သီးခြားတည်ရှိနေသည့်နယ်မြေတွေအားလုံး လုံးဝလွတ်လပ်ရေး ရယူရန်အတွက် ပင်လုံစာချုပ်ချုပ်ဆိုကြခဲ့ကြပါသည်။ သို့သော်လွတ်လပ်ရေးရရှိပြီးနောက်ပိုင်း အာဏာရ အစိုးရ အဆက်ဆက်တို့သည် ပင်လုံစာချုပ်ကိုလစ်လျူရှုခဲ့ကြသည့်အတွက် ပြည်တွင်းစစ်ဖြစ်ပွါးခဲ့ပြီး စစ်အာဏာရှင် စံနစ် ပေါ်ပေါက်လာခဲ့သည်ဟု တိုင်းရင်းသားခေါင်းဆောင်တစ်ဦးဖြစ်သူ UNLD(LA) ဥက္ကဌ ဖယ်ခုံမြို့နယ် ပြည်သူ့လွှတ်တော်ကိုယ်စားလှယ် ဦးခွန်မာကိုဘန်းမှပြောဆိုခဲ့ပါသည်။
MNDF ဒု-ဥက္ကဌ နိုင်ငွေသိမ်း
“ဗိုလ်ချုပ်အောင်ဆန်းကျဆုံးသွားတဲ့နောက်ပိုင်းမှာဆိုရင် အဲဒီကရခိုင်တို့ မွန်တို့ ကရင်တို့ကို ပြည်နယ်မဖေါ်ပေးဘူး။ ဗမာပြည်အတွက်လဲပြည်နယ်မဖေါ်ဘူး။ အဲဒီနယ်မြေအားလုံးကို ဆက်စုပြီးတော့ အဲဒီမှာဗမာပြည်မ ဆိုပြီးတော့ ဗဟိုအာဏာနဲ့လွှဲထားတဲ့အတွက်ကြောင့် အဲဒီမှာ ပင်လုံစာချုပ်အရ တန်းတူရည်တူ အခွင့်အရေးကဆုံးရှုံးသွားတယ်။ အဲတာကြောင့် ပြည်နယ်မရရှိကြတဲ့ကရင်တို့မွန်တို့ရခိုင်တို့ နောက်ပြီးတော့တန်းတူရည်တူ အခွင့်အရေးဆုံးရှုံးသွားတဲ့ ရှမ်းတို့ကချင်တို့ချင်းတို့ ကရင်နီတို့ကနေပြီးတော့ မကျေမနပ်ဖြစ်ကြတဲ့အတွက်ကြောင့် လွတ်လပ်ရေးနဲ့အတူပြည်တွင်းစစ်ဖြစ်ပွါးခဲ့လို့ နောက်ဆုံးပြည်တွင်း စစ်ကြောင့် စစ်အာဏာရှင်က တိုင်းပြည်ရဲ့အာဏာအရပ်ရပ်ကို ဝန်ကြီးချုပ်ဦးနုထံမှာ သိမ်းယူထားတာ ဖြစ်တယ်။”
ဗိုလ်ချုပ်အောင်ဆန်းနှင့်တကွ တိုင်းရင်းသားခေါင်းဆောင်များ သဘောတူညီထားသည့် ပင်လုံစာချုပ် ကိုပစ်ပယ်ခဲ့သည့်အတွက် တိုင်းရင်းသားများဘက်မှနစ်နာချက်အများအပြားရှိလာခဲ့ပြီး (၁၉၄၇) ဖွဲ့စည်းပုံ အခြေခံဥပဒေ အားနဲချက်များရှိနေသောကြောင့် (၁၉၆၁)ခုနှစ်ဇွန်လ(၆)ရက်နေ့တွင် တိုင်းရင်းသား ခေါင်းဆောင် များစုပေါင်း၍ ရှမ်းပြည်နယ်တောင်ကြီးမြို့တွင်ညီလာခံတရပ်ကျင်းပခဲ့ပါသည်။ အဆိုပါ ညီလာခံကို တက်ရောက် ခဲ့သူ မွန်အမျိုးသားဒီမိုကရေစီအဖွဲ့၏ဒုဥက္ကဌနိုင်ငွေသိမ်းမှ ၄င်း၏အတွေ့အကြုံများကို ကောင်းဝါသတင်း ဌာနသို့အောက်ပါအတိုင်းပြောဆိုခဲ့ပါသည်။
“တောင်ကြီးညီလာခံက ကျွန်တော်တို့က တိုင်းရင်းသားရဲ့အခွင့်အရေးအတွက် ဖက်ဒရယ် ပြည် ထောင်စုအသစ်ကို တည်ထောင်ဖို့အတွက် ကျွန်တော်တို့က အသိအလင်းဖော်ပြတဲ့ အစည်းအဝေး ဖြစ်ပါတယ်။ သဘောကတော့ဒီ ပြည်နယ် ပြည်ထောင်စုတည်ဆောက်ချင်တဲ့သဘောကိုပဲ သူတို့က အဲဒီ မှာတင်ပြခဲ့တာဖြစ်ပါတယ်။ ကျွန်တော်တို့တောင်ကြီးညီလာခံမှာ ကျွန်တော်တို့က ဖက်ဒရယ် ပြည်ထောင်စုကို တည်ဆောက်ဖို့ တောင်းဆိုခဲ့တယ်။ အဲ့ဒီကချွင်းချက်တစ်ခုကဘာရှိလဲဆိုတော့ တိုင်းရင်းသားအဖွဲ့အစည်းတွေကို သန့်ရှင်းနဲ့တည်မြဲနဲ့ ပေါင်းတဲ့အဖွဲ့အစည်းတွေက အဲဒီအစိုးရ အဖွဲ့တွေဖြစ်တဲ့ဝန်ကြီးတွေ ဒူးဝါးဆင်ဝါးနောင်တို့ဟာ ကျွန်တော်တို့ရဲ့ ဆန့်ကျင်ဖက်တွေဖြစ်လာတယ်။ စောချစ်သန်းတို့ဘာတို့ ခုနအဲဒီ တည်မြဲကလွှတ်တဲ့ ပုဂ္ဂိုလ်တွေက ဒီအစည်းအဝေးကိုလာပြီးတော့ တိုက်ရိုက်သော်လည်းကောင်း၊ သွယ်ဝိုက်သော်လည်းကောင်း ဆန့်ကျင်ဘက်တွေလုပ်ကြပါတယ်။”
တိုင်းရင်းသားများအနေနှင့် တခြားလူမျိုးများအပေါ်အရိုးခံစိတ်ဓါတ်နှင့် ယုံကြည်မှုလွန်ကဲသောကြောင့် မိမိတို့၏ကံကြမ္မာကို တပါးသူများအပေါ်မပုံအပ်သင့်ကြောင်း ဘဝတူချင်းပူးပေါင်းပြီး ကိုယ့်အားကိုယ်ကိုး သင့်ကြောင်း အောက်ပါအတိုင်းတိုက်တွန်းပြောဆိုခဲ့သည်။
“ကျွန်တော်တို့တတွေဟာ တိုင်းရင်းသားအဖွဲ့အစည်းတွေဟာ ကိုယ်လူမျိုး ကိုယ့်တိုင်းရင်းသား အတွက် လုပ်လို့ရှိရင် အတတ်နိုင်ဆုံးက ကိုယ့်ခြေထောက်ပေါ်ကိုယ်ရပ်တည် ကိုယ့်အားကိုယ်ကိုးပြီးတော့ တိုင်းရင်းသားအဖွဲ့အစည်းနဲ့ပူးပေါင်းပြီးလုပ်တာက အမှန်ဆုံးလို့ ကျွန်တော်တော့ အဲဒီလိုတိုက်တွန်း ချင်တယ်။”
မြန်မာ့လွတ်လပ်ရေးသည် ပင်လုံစာချုပ်မှအခြေပြုပြီးမှရရှိလာသည်ဖြစ်သော်လည်း ခေတ်အဆက်ဆက် အုပ်ချုပ်လာသည့် အာဏာပိုင်များအနေနှင့် တိုင်းရင်းသားတို့၏မူပိုင်အခွင့်အရေးကို ပြဌာန်းမပေးယုံသာမက မျိုးပြုတ်သွားအောင် သွေးနှောစံနစ်ဖြင့်သော်၎င်း သတ်ဖြတ်ခြင်းဖြင့်သော်၎င်း စာပေသင်ကြားခွင့်ကိုပိတ်ပင် သောနည်းဖြင့်သော်၎င်း ယဉ်ကျေးမှုထုံးစံများကိုဖျောက်ပစ်သောနည်းဖြင့်၎င်း ပြုလုပ်နေဆဲဖြစ်သဖြင့် အဆိုပါ လုပ်ရပ်များသည် လူမျိုးတမျိုးနှင့်တမျိုး အထင်မြင်လွှဲမှားစေသည့်အပြင် ချစ်ကြည်သွေးစည်းညီညွတ်မှုကို လည်း ပျက်ပြားစေသည်ဟု တိုင်းရင်းသားအရေးလေ့လာသူများမှဆိုပါသည်။
No comments:
Post a Comment