မင်းချမ်း၊ ကောင်းဝါ
နတ်တော်လဆန်း ၈ရက်။ဒီဇင်ဘာ ၁၄၊၂၀၁၀။
မင်းချမ်း(ဒီဇင်ဘာ-၁၄)။ ။ ယခုရက်ပိုင်းအတွင်း စစ်အစိုးရထံ လက်နက်ချအညံ့ခံခဲ့ကြသည့် ဒီကေဘီအေတပ်မှူးအချို့အရေးယူခံရနိုင်သည်ဟု ယင်းအဖွဲ့အစည်းနှင့်နီးစပ်သည့် ကရင်အမျိုးသားတစ်ဦးက ပြောသည်။
“လက်နက်ချတပ်မှူးတချို့ကိုအရှေ့တောင်တိုင်းကခေါ်ထားတယ်၊ အခြေအနေသိပ်မကောင်းဘူးလို့ ပြောနေကြတယ်” ဟု အဆိုပါကရင်အမျိုးသားက ပြောသည်။
၎င်းအပြောအရ မြိုင်ကြီးငူဆရာတော်၏လက်ထောက်ဆရာတော်တပါးက ဒီကေဘီအေ ၉၀၇ တပ်ရင်းမှူးနော်တရာအပါအဝင်တပ်မှူး ၄ ဦးတို့ကို အရှေ့တောင်တိုင်းစစ်ဌာနချုပ်သို့ ယခုရက်ပိုင်းတွင် လိုက်လံပို့ဆောင်ခဲ့သည်ဟု သိရသည်။
သို့သော် အဆိုပါအကြောင်းအရာနှင့်ပတ်သက်၍ သက်ဆိုင်သူများနှင့် သီးခြားအတည်ပြုချက်မရရှိသေးပေ။
ယနေ့စစ်အစိုးရထုတ် သတင်းစာများရေးသားချက်၌ ဒီဇင်ဘာ ၉ ရက်နေ့မှ ၁၂ ရက်နေ့အတွင်း နိုင်လွင်၊ စောလှဒါး၊ စောအောင်ဆန်း၊ နော်တရာ၊ ချင်းလုံ၊ စောစိန်သန်းနှင့် စိုးမိုးတို့အပါအဝင် စုစုပေါင်း ၅၁ ဦး ဥပဒေဘောင်အတွင်းဝင်ရောက်ခဲ့သည်ဟု ဖေါ်ပြပါရှိသည်။
အဆိုပါသတင်းစာ၌ KNU အကြမ်းဖက်သောင်းကျန်းသူ စောလားဘွယ်အဖွဲ့မှ အဖွဲ့ဝင် ၅၁ ဦး အရှေ့တောင်တိုင်းစစ်ဌာနချုပ်နယ်မြေ၌ ဝင်ရောက်ခဲ့သည်ဟု ရေးသားဖေါ်ပြခဲ့သည်။
သို့သော် စောလားဘွယ် (ခေါ်) ဗိုလ်မှူးချုပ်နှုတ်ခမ်းမွေးသည် KNU အဖွဲ့ဝင်မဟုတ်ကြောင်း၊ နယ်ခြားစောင့်တပ်ဖွဲ့လိုက်မခံသည့် ဒီကေဘီအေမှဗိုလ်မှူးချုပ်တစ်ဦးဖြစ်ကြောင်း နိုင်ငံတကာသတင်းဌာနအသီးသီးတွင် အမြဲမပြတ်ရေးသားဖေါ်ပြနေသည်ကို တွေ့ရှိရသည်။
၁၅ နှစ်ကျော်ခန့် စစ်အစိုးရနှင့်အပစ်ရပ်ခဲ့သည့် ဒီကေဘီအေတပ်ဖွဲ့ဝင်များသည် ရွေးကောက်ပွဲကျင်းပပြီးနောက်တစ်နေ့၌ မြဝတီနှင့်ဘုရားသုံးဆူမြို့များကို သိမ်းပိုက်ခဲ့သည့်အတွက် စစ်အစိုးရတပ်ဖွဲ့များနှင့် ယနေ့အထိတိုက်ပွဲများဆက်လက်ဖြစ်ပေါ်လျှက်ရှိနေကြောင်း သတင်းများတွင်ဖေါ်ပြနေသည်။
ဥပဒေဘောင်အတွင်းဝင်ရောက်ခဲ့သည်ဟု စစ်အစိုးရသတင်းရေးသားချက်များမှာ လက်နက်ချသည်ဟုအဓိပ္ပါယ်ရှိပြီး လက်နက်အရေအတွက်ဖေါ်ပြထားခြင်းမရှိသဖြင့် စစ်အစိုးရသတင်းစာဖေါ်ပြသည့် ၅၁ ဦးမှာ လက်နက်မဲ့လက်နက်ချခဲ့သည်ဟု ယူဆရကြောင်း နယ်စပ်စစ်ရေးလေ့လာသူများက သုံးသပ်ကြသည်။
“ဘုရားသုံးဆူမှာစတင်ပစ်ခတ်ဖို့ အမိန့်ပေးခဲ့တာ နော်တရာပဲ၊ ဒါကြောင့်သူ့ကို နအဖကနိုင်ငံတော်ပုန်ကန်မှုနဲ့ တရားစွဲမယ်လို့ပြောဆိုသံတွေထွက်ပေါ်နေတယ်” ဟု ကေအဲန်ယူတပ်မဟာ ၆ မှအမည်မဖေါ်လိုသူ အရာရှိတစ်ဦးက ပြောသည်။
အလားတူ ယခုလ ၄ ရက်နေ့ထုတ် သတင်းစာများတွင်လည်း ကရင်တောတွင်းလက်နက်ကိုင်အဖွဲ့ ၃၄ ဦး လက်နက်ချခဲ့သည်သတင်း၌ လက်နက်စာရင်းများနှင့်တကွ အသေးစိတ်ဖေါ်ပြထားသည်ကို ယခင်သတင်းများတွင် ဖေါ်ပြခဲ့ပြီး ဖြစ်သည်။
စစ်အစိုးရသတင်းစာရေးသားချက်တွင် လက်နက်ချသည့်နေရာဒေသများအား အတိအကျရေးသားဖေါ်ပြခဲ့ခြင်းမရှိပဲ အရှေ့တောင်တိုင်းစစ်ဌာနချုပ်နယ်မြေဟုသာ ယေဘူယျသဘောသာ ဖေါ်ပြခဲ့သည်။
လက်ရှိအရှေ့တောင်တိုင်းစစ်ဌာနချုပ်နယ်မြေသည် မွန်ပြည်နယ်နှင့်ကရင်ပြည်နယ်ဟု သိရသည်။
http://www.kaowao.org/b/2010news-december-14.php
No comments:
Post a Comment