တင်းမာမှုဒီဂရီ တိုးပြလာနေတဲ့ မနောမြေက သေနတ်သံများ

စာရေးသူ - တူမောင်ညို

- ကချင်ပြည်နယ် အထူးဒေသ (၂) KIO (လိုင်စင်)
- ရှမ်းပြည်နယ်(မြောက်ပိုင်း) အထူးဒေသ (၂) UWSP (ပန်ဆန်း)
- ရှမ်းပြည်နယ်(အရှေ့ပိုင်း) အထူးဒေသ (၄) NDAA (မုံးလား)

အပစ်ရပ်ထားကြတာလည်း တူတယ်။
နယ်ခြားစောင့်တပ်(BGF) အဖြစ် အသွင်ပြောင်းရေး လက်မခံနိုင်ကြတဲ့ကိစ္စမှာလည်း တစ်စုံတစ်ရာ တူညီမှုတွေရှိနေတယ်။
တရုတ်နယ်စပ်ကို ကျောပေးထားကြတာခြင်းလည်း တူတယ်။
ဒါပေမယ့် ဘာဖြစ်လို့ (KIO) ကို ကွက်ပြီး စစ်ရေးဖိအားတွေ တိုးပေးလာရတာလဲ။
အပစ်အခတ်ရပ်စဲရေး (ငြိမ်းချမ်းရေး) လုံးလုံးလျားလျား ပျက်သုန်းသွားပြီဆိုတာကို ဖော်ပြချင်တာလား။
“အမာကို ရှောင် အမွကို တိုက်” ဆိုတဲ့စစ်ပရိယာယ်လား။
တရုတ်အစိုးရနဲ့ (MoU) ထိုးထားတဲ့ “ဧရာဝတီမြစ်ဆုံ ရေအားလျှပ်စစ်စီမံကိန်း၊ ကျောက်ဖြူ- ယူနန် ရေနံနဲ့ သဘာဝဓါတ်ငွေ့ ပိုက်လိုင်းစီမံကိန်း၊ မူဆယ်- ကျောက်ဖြူ ရထားပို့ဆောင်ရေးစနစ် စီမံကိန်း၊ စစ်ကိုင်းတိုင်း ဒေသကြီးနဲ့ ကချင် ပြည်နယ်အတွင်းက အထွေထွေကုန်ထုတ်လုပ်ရေး စီမံကိန်း” တွေအတွက် ရည်ရွယ်ပြီး ရှင်းလင်းရေးလုပ်သလား။
သမ္မတဦးရှစ်လုံးပြောတဲ့ “ငြိမ်းချမ်းရေးမယူသေးသည့်အဖွဲ့ (၂) ဖွဲ့” နဲ့ ပူးပေါင်းသွားတဲ့ ၃ ဖွဲ့ထဲမှာ (KIO) ပါနေတာကြောင့်လား။ ဒီလိုဆိုရင် (KIO) နဲ့ “ငြိမ်းချမ်းရေး” ယူထားတာ ပျက်သွားပြီဆိုတဲ့ သဘောပေါ့။
တင်းမာမှုက သေနတ်သံထွက်ရုံတင်မကဘူး၊ နှစ်ဖက်သေဆုံးထိခိုက်ဒဏ်ရာရတဲ့အဆင့်ထိ ဒီဂရီတိုးလာနေတယ်။
“နှစ်နိုင်ငံနယ်စပ်မှာ ကီလိုမီတာ ၂၀၀၀ ကျော် ရှည်လျားပြီး နှစ်နိုင်ငံ စီးပွားရေးဖွံ့ဖြိုးတိုးတက်ရေးအတွက် နယ်စပ်ဒေသ တည်ငြိမ်အေးချမ်းရေးမှာ များစွာအရေးကြီးပါကြောင်း” ဆိုပြီး တရုတ်သမ္မတဟူက သမ္မတဦးသိန်းစိန်ကို ပြောလိုက်တာ ရက်ပိုင်းမျှ (၁၆ ရက်ခန့်) သာ ရှိပါသေးတယ်။

အပစ်ရပ်တဲ့ကိစ္စမှာ (KIO) ဟာ အခြားအဖွဲ့များနဲ့ မတူတဲ့ခြားနားမှုတွေ ရှိပါတယ်။
အပစ်အခတ်ရပ်စဲဖို့ (နဝတ) စစ်အစိုးရနဲ့ အကြာဆုံးဆွေးနွေးတဲ့အဖွဲ့ဟာ (KIO) ဖြစ်ပါတယ်။ ၄ နှစ်နီးပါးလောက်ကြာပါတယ်။
အပစ်အခတ်ရပ်စဲရေးအတွက် (KIO) နဲ့ (နဝတ) စစ်အစိုးရ ၁၉၉၀ ပြည့်နှစ်မှာ ဖြစ်ပါတယ်။ အငြိမ်းစားသံအမတ်ကြီး ဦးလဝမ်၊ သိက္ခာတော်ရဆရာတော် ဦးဇဘွဲကျွံနဲ့ ဦးခွန်မြတ်တို့က ဆက်သွယ်ပေးမှုနဲ့ ကြူကုတ် (ပန်ဆိုင်း) မှာ စတင်ဆွေးနွေးတာပါ။ အဲဒီကာလမှာ (KIO) နဲ့ အပစ်အခတ်မရပ်စဲနိုင်ခဲ့ပါဘူး။

ဒါပေမယ့် ရှမ်းပြည်နယ်ထဲမှာရှိတဲ့ (KIO) ရဲ့ တပ်မဟာ (၄) နဲ့ ၁၉၉၁ ခုနှစ်၊ ဇန်နဝါရီ (၁၃) ရက်နေ့မှာ အပစ်အခတ်ရပ်စဲ ခဲ့ပါတယ်။ တပ်မဟာ (၄) ရဲ့ဒုတိယတပ်မဟာမှူး ဦးမထုနော်နဲ့ (ရမခ) တိုင်းမှူးတို့ လားရှိုးမြို့မှာ တွေ့ဆုံဆွေးနွေး သဘောတူခဲ့တာ ဖြစ်ပါတယ်။ တပ်မဟာ (၄) က “ကောင်ခါး” ကို ဌာနချုပ်လုပ်ထားပါတယ်။

၁၉၉၂ ခုနှစ်၊ အောက်တိုဘာလ ၂၄ ရက်နေ့၊ လားရှိုးမြို့မှာ (ရမခ) တိုင်းမှူး၊ ဒုတိယတပ်မတော်ထောက်လှမ်ရေး ညွန်ကြားရေးမှူး ဗိုလ်ချုပ်ကျော်ဝင်းတို့နဲ့ (KIO) က ဒေါက်တာလဂျာ ခေါင်းဆောင်တဲ့ ကိုယ်စားလှယ်အဖွဲ့တွေ ဆွေးနွေးကြပါတယ်။
ဒါပေမယ့် ၁၉၉၄ ခုနှစ်၊ ဖေဖေါ်ဝါရီလ ၂၄ ရက် နေ့မှ “ငြိမ်းချမ်းရေး သဘောတူညီချက်” လက်မှတ်ရေးထိုးနိုင်ခဲ့ပါတယ်။ အဲဒီပွဲကို ဗိုလ်ချုပ်ဇော်မိုင်နဲ့ ဗိုလ်ချုပ်ခင်ညွန့်တို့ တက်ပါတယ်။

နောက်ထပ်ထူးခြားချက်တစ်ခုက (KIO) ကိုယ်စားလှယ်က “အမျိုးသားညီလာခံ” မှာ တက်တက်ကြွကြွပါဝင်တက်ရောက် ဆွေးနွေးတာပါ။ ဒါ့အပြင် မြစ်ကြီးနားမှာ ပြုလုပ်တဲ့ ကြံ့ဖွံ့အသင်းက လုပ်တဲ့ “လူထုအစည်းအဝေးပွဲ” ရဲ့ သဘာပတိစင်မြင့်ပေါ်မှာ အဲဒီ ကိုယ်စားလှယ်ကြီးကို ဦးစခုန်တိန့်ယိန်းနဲ့အတူ တွေ့ရပါတယ်။

ဖွဲ့စည်းပုံအခြေခံဥပဒေ (၂၀၀၈) ရဲ့အခြေခံမူများနဲ့ သေးစိတ်အခြေခံရမယ့်မူတွေပါတဲ့ မော်ကွန်းမှတ်တမ်းဆိုတဲ့ စာအုပ်ကိုလည်း အဲဒီကိုယ်စားလှယ်ကြီးကပဲ ထိုစဉ်က ညီလာခံကျင်းပရေး ကောင်မရှင်ဥက္ကဋ္ဌ ဒုတိယ ဗိုလ်ချုပ်ကြီးသိန်းစိန် (ယခု သမ္မတ) ထံ အပ်နှံနေတဲ့ပုံကို ၂၀၀၇ ခုနှစ်၊ စက်တင်ဘာလ ၃ ရက်နေ့ နေ့စဉ်ထုတ်သတင်းစာတွေမှာ တွေ့နိုင်ပါတယ်။

နောက်တော့ အဲဒီကိုယ်စားလှယ်ကြီးဟာ (KIO) ထွက်ပြီး နိုင်ငံရေးပါတီထောင်ဖို့ ကြိုးစားပါတယ်။
သိန်းစိုးကော်မရှင်က “တည်ထောင်ခွင့်” ပင်မပြုခဲ့ပါဘူး။ ၂၀၁၀ ရွေးကောက်ပွဲမှာ တသီးပုဂ္ဂလအဖြစ် ဝင်ရောက်အရွေးချယ်ခံဖို့ ထပ်မံကြိုးစားခဲ့ပါတယ်။ ဒါကိုလည်း သိန်းစိုးကော်မရှင်က ခွင့်မပြုပါဘူး။
နောက်ဆုံးမှာတော့ မြစ်ကြီးနားမှာရှိတဲ့ ကြံ့ဖွံပါတီထဲမြို့မိမြို့ဖအဖြစ် ဝင်ရောက်ဖို့လျှောက်ထားခဲ့ပါတယ်။
ကြည့်ရတာ “ကြံ့ဖွံ့ပါတီ” က ဘာမှတုန့်ပြန်ပုံ မပေါ်ပါဘူး။

နောက်ထူးခြားချက်တစ်ခုကတော့
၂၀၁၀ နိုဝင်ဘာ (၄) ရက်နေ့မှာဖွဲ့စည်းတဲ့ “ဖယ်ဒရယ် ပြည်ထောင်စု ပေါ်ထွန်းရေးကော်မတီ (CEFU)” မှာ ဥက္ကဋ္ဌအဖြစ် (KIO) ဒုတိယ ဥက္ကဋ္ဌ ဗိုလ်ချုပ်အင်ဘန်လပါဝင်လာတာကို တွေ့ရပါတယ်။ အဲဒီဖက်ဒရယ် ပြည်ထောင်စု ပေါ်ထွန်းရေးကော်မတီ (CEFU) ဟာ ၂၀၁၁ ဖေဖေါ်ဝါရီလထဲမှာ “ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC)” အဖြစ် ယခုအခါ ပြင်ဆင်ဖွဲ့စည်းထားပြီး ဖြစ်ပါတယ်။
(UNFC) ရဲ့ဖွဲ့စည်းပုံအခြေခံဥပဒေ (မူကြမ်း) အခန်း (၂) ၊ ပုဒ်မ (၆) -
(ဂ) စစ်အာဏာရှင်အုပ်စုက UNFC အဖွဲ့ဝင်အား တိုက်ရိုက်ဖြစ်စေ၊ သွယ်ဝိုက်၍ ဖြစ်စေ နိုင်ငံရေးအရ ဖိတ်ခေါ် ကမ်းလှမ်းလာလျှင် တဖွဲ့ချင်းအနေဖြင့် တွေ့ဆုံဆွေးနွေးမှုမပြုရန်နှင့် UNFC အနေဖြင့်သာ စုစည်းဆွေးနွေးရန်။
(ဃ) နိုင်ငံရေးအရဖြစ်စေ၊ သဘောတရားရေးအရဖြစ်စေ ရန်/ငါစည်းပြတ်သားမှုရှိခြင်း။
အခန်း (၄) ပုဒ်မ (၁၄) -
(ဆ) ဖက်ဒရယ်ကောင်စီ အဖွဲ့ဝင်တဖွဲ့ကို စစ်အာဏာရှင်အုပ်စုက ကျူးကျော်တိုက်ခိုက်ခြင်းများ ပြုလုပ်လာလျှင် ကျန်ဖက်ဒရယ် ကောင်စီအဖွဲ့ဝင်များက ဖက်ဒရယ်ကောင်စီ၏ ဆုံးဖြတ်ညွှန်ကြားချက်များအရ လိုက်နာဆောင်ရွက်သွားကြရမည်။
စသဖြင့်ဖေါ်ပြပါရှိပါတယ်။ (UNFC) တွင် အပစ်ရပ်အဖွဲ့တွေဖြစ်တဲ့ မွန်ပြည်သစ်ပါတီ (NMSP)၊ (KIO) တို့ ပါဝင်ပါတယ်။

နောက်ဆုံးတင်ပြလိုတဲ့အချက်ကတော့ ဒီလိုစစ်ရေးတင်းမာမှုတွေ ဖြစ်လာနေတာကို ပြည်တွင်းပြည်မမှာရှိတဲ့ နိုင်ငံရေးပါတီ အဖွဲ့အစည်းအသီးသီးက ဘယ်လိုပါဝင်ဆောင်ရွက်ကြမလဲဆိုတဲ့ အချက်ဖြစ်ပါတယ်။
ကိုယ့်ပြဿနာကိုယ်ရှင်းဆိုပြီး သီးခြား ကင်းလွတ်စွာနေထိုင်ဖို့ မဖြစ်နိုင်ပါဘူး။
၂၀၁၀ ရွေးကောက်ပွဲမှာ ပါဝင်ခဲ့ကြတဲ့ နိုင်ငံရေးပါတီတွေ/ရွေးချယ်ခံပြည်သူ့ကိုယ်စားလှယ်တွေ အနေနဲ့လည်း ဒီကိစ္စတွေကို အလေးထားကိုင်တွယ်ဖြေရှင်းရမယ့် တာဝန်ရှိပါတယ်။
“နယ်စပ်ရေးရာဝန်ကြီးဌာနနဲ့ ပြည်သူ့စစ်နှင့် နယ်ခြားတပ်များညွန်ကြားရေးမှူးရုံး” ကသာ ကိုင်တွယ်ဖြေရှင်းရမယ့် ပြဿနာအဖြစ် သတ်မှတ်ပိုင်းခြားထားလို့ (လုံးဝ) မဖြစ်နိုင်ပါဘူး။
ဒါဟာ မပြီးဆုံးသေးတဲ့ ပြည်တွင်းစစ်ပြဿနာ။
တိုင်းရင်းသားလူမျိုးများအရေးနဲ့ဆိုင်တဲ့ နိုင်ငံရေးပြဿနာ။
ဖွဲ့စည်းပုံအခြေခံဥပဒေ (၂၀၀၈) ဘောင်ထဲက ဖြေရှင်းလို့မရတဲ့ ပြဿနာအဖြစ် ဖေါ်ပြနေတာလည်းဖြစ်တယ်။
တူမောင်ညို

(၂၀၁၁ ခုနှစ်၊ ဇွန်လ ၁၂ ရက်)
http://www.yoma3.org/?p=2246