ရှမ်းပြည်မြောက်ပိုင်း SSA တပ်နဲ့ အစိုးရတပ်တွေ မနေ့ကစပြီး တိုက်ပွဲဖြစ်ပွားနေတယ်လို့ သိရပါတယ်။ ရှမ်းပြည်မြောက်ပိုင်း၊ တန့်ယန်းမြို့နယ်အတွင်းမှာ မနေ့ ညနေ (၃) နာရီခွဲလောက်က စတင်ပြီး နှစ်ဘက်တပ်တွေကြား အပြန်အလှန် ပစ်ခတ်တိုက်ခိုက်ခဲ့ကြတာဖြစ်ကြောင်း SSPP/SSA မြောက်ပိုင်းရဲ့ ပြောရေးဆိုခွင့်ရှိသူ ဗိုလ်မှုးစိုင်းလ က ပြောပါတယ်။
ထိုင်း-မြန်မာနယ်စပ်၊ ဒွိုင်တလန် စခန်းတွင် စစ်လေ့ကျင့်နေသော ရှမ်းပြည်တပ်မတော် (SSA) တပ်ဖွဲ့ဝင်များပုံ
“လာပြီးတော့တိုက်တယ်၊ ကျနော်တို့ တန့်ယန်းမြို့နယ်ပေါ့၊ ၇ မိုင်စခန်းအရှေ့ဘက်ပေါ့၊ ကျနော်တို့တပ်က တပ်မဟာ ၃၆ လက်အောက်ခံ တပ်ရင်း ၂၉၉ သူတို့က ခမရ ၃၂၂ ညနေငါးနာရီလောက်ထိ ပစ်ခတ်မှုတွေဖြစ်နေတုန်းပဲ”
နှစ်ဖက်အထိအခိုက် အကျအဆုံးနဲ့ ပတ်သက်လို့တော့ မသိရသေးဘူးလို့ ဗိုလ်မှုးစိုင်းလ က မနေ့က ပြောခဲ့ပါတယ်။
SSPP/SSA ရှမ်းပြည်မြောက်ပိုင်းနဲ့ အစိုးရတပ်တွေ အပစ်အခတ်ရပ်စဲရေး သဘောတူလက်မှတ်ထိုးထားတာ တစ်နှစ်ကျော်ရှိခဲ့ပြီဖြစ်ပါတယ်။ ဒီအတွင်းအစိုးရတပ်က ရှမ်းပြည်တပ်မတော်က တပ်ဖွဲ့တွေကို ဆုတ်ပေးဖို့ ပြောဆိုလာတာကြောင့် စခန်းတချို့ ဆုတ်ပေးလိုက်ရတာတွေလည်း ရှိခဲ့တယ်လို့ ဗိုလ်မှုးစိုင်းလ က ဆိုပါတယ်။
“သူတို့တိုက်ချင်တဲ့အချိန် တိုက်တယ်၊ နောက်အကောင်းပြောတဲ့အချိန် ပြောတယ်၊ အဲတော့ ယုံကြည်မှု တည်ဆောက်နေတဲ့အချိန်မှာ သူတို့လုပ်ချင်တိုင်း လုပ်နေရင်တော့ အဟန့်အတားတော့ဖြစ်မှာပေါ့”
SSA မြောက်ပိုင်းအဖွဲ့ပါဝင်တဲ့ UNFC နဲ့ အစိုးရကိုယ်စားလှယ်တွေ ဒီကနေ့ ချင်းမိုင်မြို့မှာ တွေ့ဆုံဆွေးနွေးကြမှာဖြစ်ပါတယ်။
No comments:
Post a Comment