သန်းထိုက်ဦး - ဧရာဝတီ
ရှမ်းပြည်တပ်မတော် (SSA) တောင်ပိုင်း တပ်ဖွဲ့ဝင်များ အခြေစိုက် လှုပ်ရှားနေသည့် ရှမ်းပြည်နယ် အရှေ့ပိုင်း မိုင်းဆတ်ခရိုင် မိုင်းထမြို့နယ်ခွဲရှိ လွိုင်မို့နန်းလျန်း တပ်စခန်းကို ယနေ့ နောက်ဆုံးထားပြီး ဆုတ်ခွာပေးရန် အစိုးရ စစ်တပ်က အကြောင်းကြားထားကြောင်း သတင်းရရှိသည်။
ယင်း လွိုင်မို့နန်းလျန်း တပ်စခန်းကို အစိုးရ တြိဂံတိုင်း စစ်ဌာနချုပ်မှ ဒု တိုင်းမှူး အဆင့်ရှိသူတဦးက ပြီးခဲ့သည့် တပတ်က အကြောင်းကြားထားကြောင်း၊ ၎င်းတို့၏ တပ်စခန်း အနီးအနားတွင် အစိုးရတပ် စစ်အင်အားလည်း တိုးချဲ့ထားကြောင်း SSA တောင်ပိုင်းမှ ပြောရေးဆိုခွင့်ရှိသူ ဗိုလ်မှူး စိုင်းလောင်ဆိုင်းက ဧရာဝတီသို့ ပြောသည်။
မတ်လ ၁၁ ရက်နေ့ကလည်း ရှမ်းပြည်နယ် တောင်ပိုင်း လင်းခေးခရိုင် ဟိုမိန်းမြို့နယ်ခွဲရှိ လွိုင်လျန်း တပ်စခန်းတခုမှ ဆုတ်ပေးရန် ပြောဆိုခဲ့သေးကြောင်း၊ ရှမ်းပြည်နယ်အစိုးရ နယ်စပ်ရေးရာ ၀န်ကြီး ဗိုလ်မှူးကြီး အောင်သူ၏ တောင်းဆိုမှုကြောင့် ဆုတ်ပေးခဲ့ရပြီးနောက် လွိုင်မို့နန်းလျန်း တပ်စခန်းကို ထပ်မံ ဆုတ်ပေးရန် တောင်းဆိုလာခြင်း ဖြစ်ကြောင်း ၎င်းက ဆိုသည်။
“စခန်းကို မဖယ်ပေးဘူးဆိုရင် ပစ်မယ့် သဘောရှိတယ်။ ဒါပေမယ့် ဒီကိစ္စကိုတော့ သက်ဆိုင်ရာ ပြည်ထောင်စု အဆင့် ငြိမ်းချမ်းရေး ဖော်ဆောင်မှု လုပ်ငန်းကော်မတီ ဒုက္ကဌ ဦးအောင်မင်းဆီကို အကြောင်းကြားထားတယ်” ဟု ဗိုလ်မှူး စိုင်းလောင်ဆိုင်းက ဆက်ပြောသည်။
တပ်စခန်းများ ဆုတ်ခွာပေးရေးနှင့် ပတ်သက်၍ လတ်တလော တောင်ကြီးမြို့တွင် ဖွင့်လှစ်ထားသည့် SSA တောင်ပိုင်း ဆက်ဆံရေးရုံး တာဝန်ရှိသူများမှ တဆင့် ဦးအောင်မင်းထံ အကြောင်းကြားထားသော်လည်း အကြောင်းပြန်ခြင်း မရှိသေးကြောင်း ၎င်းက ဆိုသည်။
SSA တောင်ပိုင်း တပ်ဖွဲ့ဝင်များ ဆုတ်ပေးထားသည့် လွိုင်လျန်း တပ်စခန်းကိုလည်း အစိုးရတပ်များက ယခုလ ၁၅ ရက်နေ့မှ စတင်၍ ၂ ရက်ကြာ လက်နက်ကြီးသုံး၍ ပစ်ခတ်ခဲ့သည်ဟု ဗိုလ်မှူး စိုင်းလောင်ဆိုင်းက ပြောသည်။
“ကျနော်တို့ ဆုတ်ပေးပြီးပါပြီ။ ဆုတ်ပေးပေမယ့်လည်း အဲဒီတောင်ကုန်းကို သွားပြီး ပစ်နေတယ်။ သွားမနေရဲလို့လား၊ ဒါမှမဟုတ် တိုက်ပွဲဖြစ်အောင် ဖန်တီးနေတာလား မသိဘူး။ လက်နက်ကြီးနဲ့ ပစ်နေတာ ၂ ရက်လောက်ရှိပြီ” ဟု ၎င်းက ဆိုသည်။
SSA တောင်ပိုင်း တပ်ဖွဲ့ဝင်များ အနေနှင့် ပြန်လည် ခုခံတိုက်ခိုက်ခြင်း မပြုလုပ်ကြောင်း၊ အစိုးရဘက်မှ ဟိုမိန်းမြို့နယ်တွင် လှုပ်ရှားနေသည့် အစိုးတပ်ရင်း ၂ ရင်းနှင့် ဟိုမိန်း ပြည်သူစစ် တပ်ဖွဲ့ ပူးပေါင်း၍ တိုက်ခိုက်ခဲ့ကြောင်း စိုင်းလောင်ဆိုင်းက ပြောသည်။
ယမန်နေ့က လားရှိုးမြို့တွင် တိုင်းရင်းသား ညီလာခံ အစည်းအဝေး တက်ရန် ရောက်ရှိနေသည့် ပြည်ထောင်စုအဆင့် ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒုက္ကဌ ဦးအောင်မင်းက ရှမ်းပြည်တွင် အပစ်အခတ် ရပ်စဲထားသည့် SSA တောင်ပိုင်း တပ်ဖွဲ့ဝင်များနှင့် တိုက်ပွဲများ ပြန်လည်ဖြစ်ပွားရခြင်းမှာ နယ်မြေ မခွဲခြားရသေးသောကြောင့် ဖြစ်သည်ဟု ပြောသည်။
ယင်း ကိစ္စများအတွက် ရှမ်းတိုင်းရင်းသား လက်နက် အဖွဲ့အစည်းများနှင့် တွေ့ဆုံ ဆွေးနွေးရန် စီစဉ်ထားကြောင်းလည်း ၎င်းကဆိုသည်။
အစိုးရတပ်များ၏ နေရာရွှေ့ပြောင်းရန် တောင်းဆိုခံရသော အဆိုပါနေရာများသည် SSA တောင်ပိုင်း တပ်ဖွဲ့များ ဌာနချုပ်အဖြစ် ထားရှိရန် အစိုးရနှင့် သဘောတူညီချက်တွင် ပါရှိကြောင်း သိရသည်။
စိုင်းလောင်ဆိုင်းက “ဒီ ၂ နေရာဟာ ကျနော်တို့ကို ဗဟိုဌာနချုပ် အဖြစ် သူတို့က ပေးမယ် ဆိုပြီးတော့ ပြောထားတယ်၊ အခုတော့ မပေးဘဲ တိုက်နေတယ်” ဟု ပြောသည်။
လတ်တလောတွင် စစ်ရေးအရ တင်းမာနေသော်လည်း နှစ်ဖက် ရင်ဆိုင်တိုက်ပွဲဖြစ်မည့် အခြေအနေများ မရှိကြောင်း၊ SSA တောင်ပိုင်း အနေနှင့် အတတ်နိုင်ဆုံး ထိန်းသိမ်းသွားမည် ဖြစ်ကြောင်း ၎င်းက ဆိုသည်။
အစိုးရနှင့် SSA တောင်ပိုင်းတို့အကြား ၂၀၁၁ ခုနှစ် ဒီဇင်ဘာ ၂ ရက်နေ့က ပဏာမ အပစ်အခတ် ရပ်စဲရေး သဘောတူညီမှု ရရှိပြီး နောက်ပိုင်း တိုက်ပွဲပေါင်း ၅၀ ကျော် ဖြစ်ပွားခဲ့ကြောင်း၊ တိုက်ပွဲအများစုမှာ နယ်မြေကျွံမှုများ ဖြစ်ကြောင်း သိရသည်။
အဆိုပါ တိုက်ပွဲများသည် ရှမ်းပြည် ပြန်လည်ထူထောင်ရေး ကောင်စီ (RCSS) ဥက္ကဌ ဒု ဗိုလ်ချုပ်ကြီး ယွက်စစ် ဦးဆောင်သော အဖွဲ့နှင့် ပြည်ထောင်စု ငြိမ်းချမ်းရေးဖော်ဆောင်မှု လုပ်ငန်းကော်မတီ ဒု ဥက္ကဋ္ဌ ဝန်ကြီး ဦးအောင်မင်းတို့ ဖေဖော်ဝါရီလအတွင်း နောက်ဆုံး နှစ်ဘက် အပစ်ခတ်ရပ်စဲရေး ကိစ္စများ ဆွေးနွေးပြီးနောက်ပိုင်း စစ်ရေးတင်းမာမှု ပြန်လည် ဖြစ်ပေါ်ခြင်းဖြစ်သည်။
No comments:
Post a Comment