ondragstart="return false" onselectstart="return false"

Sunday, September 23, 2012

ငြိမ်းချမ်းရေးကျောက်တိုင် ဖြိုဖျက်ခံရ / ငြိမ်းချမ်းရေးနေ့ ဦးဆောင်သူတွေကို သက်ဆိုင်ရာက တရားစွဲ

2012-09-22

ရန်ကုန်တက္ကသိုလ်အနီး အင်ယားကန်ဘောင်မှာ ထောင်နဲ့ချီတဲ့ ငြိမ်းချမ်းရေး ဆန္ဒပြသူတွေ မနေ့က အင်္ဂတေနဲ့ စိုက်ထူထားခဲ့တဲ့ ငြိမ်းချမ်းရေး ကျောက်တိုင်ကို ဒီကနေ့ ဖြိုဖျက်ခံထားရတာ တွေ့ရတယ်လို့ ငြိမ်းချမ်းရေး ကွန်ယက်အဖွဲ့ဝင် မခင်စန္ဒာညွှန့်က RFA ကို အတည်ပြု ပြောပါတယ်။


၂၀၁၂ ခုနှစ် စက်တင်ဘာလ ၂၁ ရက်က ရန်ကုန်မြို့ အင်းယားကန်ဘောင်တွင် မြန်မာနိုင်ငံတွင်း စစ်ပွဲတွေရပ်ရန် အရပ်ဖက် အဖွဲ့ အစည်းများ စုပေါင်း ဆန္ဒဖော်ထုတ်ပွဲ ပြုလုပ်နေစဉ်။

ငြိမ်းချမ်းရေးကျောက်တိုင် ဖျက်ဆီးခံရမှုဟာ ငြိမ်းချမ်းရေးကို ဆန့်ကျင်မှုဖြစ်ပြီး မနေ့က ဆန္ဒဖော်ထုတ်ပွဲအပြီးမှာ နောက်ယောင်ခံ လိုက်ခံရတာ၊ လူကြားထဲဆွဲခံရတာ၊ မြို့နယ်က တရားစွဲခံရတာတွေလည်း ရှိခဲ့တယ်လို့ မခင်စန္ဒာညွှန့်က ပြောပါတယ်။

မနေ့က ရန်ကုန်မြို့မှာ ပြုလုပ်ခဲ့တဲ့ အပြည်ပြည်ဆိုင်ရာ ငြိမ်းချမ်းရေးနေ့ အထိမ်းအမှတ် ဆန္ဒဖော်ထုတ်ပွဲကို ဦးဆောင်ခဲ့သူ တာဝန်ခံတွေဖြစ်တဲ့ ကိုမိုးသွေး၊ ကိုကျော်ကိုကို၊ မဖွေးယုမွန်နဲ့ မခင်စန္ဒာညွန့်တို့ လေးဦးဟာ ခွင့်ပြုချက်မယူဘဲ စီတန်းလှည့်လည် မှုနဲ့ တရားစွဲဆိုခံထားရပါတယ်။

ဒီအတောအတွင်း အပြည်ပြည်ဆိုင်ရာ ငြိမ်းချမ်းရေးနေ့မှာ ငြိမ်းချမ်းရေးနဲ့ ကျန်ရှိနေတဲ့ နိုင်ငံရေး အကျဉ်းသားတွေ အားလုံး ခြွင်းချက်မရှိ လွတ်မြောက်ရေး ဆုတောင်းပွဲမှာ ပါဝင်ခဲ့သူ သံဃာတော် တစ်ပါးဖြစ်တဲ့ ဆရာတော် ဦးပညာဝံသကို ဒီကနေ့မှာ မြို့နယ်သံဃာ့ မဟာနာယကက ခေါ်ယူပြီး ခံဝန်ကတိ လက်မှတ် ထိုးခိုင်းခဲ့တယ်လို့ ဦးပညာဝံသက ပြောပါတယ်။

တချိန်တည်းမှာဘဲ အပြည်ပြည်ဆိုင်ရာ ငြိမ်းချမ်းရေးနေ့ အထိမ်းအမှတ်အဖြစ် ပြည်မြို့မှာ လုပ်ခဲ့တဲ့ ဆန္ဒဖော်ထုတ်ပွဲမှာ ပါဝင်ခဲ့တဲ့ ဆရာတော် ဦးဝိမလကိုလည်း သာသနာရေးရုံးက ခံဝန်ကတိ လက်မှတ်ရေး ထိုးခိုင်းခဲ့တယ်လို့ သိရပါတယ်။

မနေ့က ရန်ကုန်ဆန္ဒဖော်ထုတ်ပွဲကို ဦးဆောင်ခဲ့သူတွေထဲက လောလောဆယ်အထိ (၉) ဦး တရားစွဲဆို ခံထားရတယ်လို့လည်း သိရပါတယ်။

ငြိမ်းချမ်းရေးနေ့ ဦးဆောင်သူတွေကို သက်ဆိုင်ရာက တရားစွဲ
2012-09-22

ရန်ကုန်နဲ့ ရှမ်းပြည်နယ် တောင်ကြီး အောင်ပန်းမြို့တွေမှာ အပြည်ပြည်ဆိုင်ရာ ငြိမ်းချမ်းရေးနေ့ ဦးဆောင်သူတွေကို သက်ဆိုင်ရာက တရားစွဲလိုက်ပြီလို့ သတင်းရရှိပါတယ်။

စက်တင်ဘာလ ၂၁ ရက်နေ့ကို အပြည်ပြည်ဆိုင်ရာ ငြိမ်းချမ်းရေးနေ့အဖြစ် ကမ္ဘာ့ကုလသမဂ္ဂက ဆုံးဖြတ်ထားတာကို မြန်မာနိုင်ငံသား လူငယ်အဖွဲ့တွေက စုပေါင်းကျင်းပခဲ့ကြတာပါ။

ဒီအပေါ်မှာ တည်ဆဲဥပဒေအရ ခွင့်ပြုချက်မရှိဘဲ စီတန်း လှည့်လည်မှုနဲ့ တရားစွဲခံရတာ ဖြစ်တယ်လို့ ရန်ကုန်မြို့က ငြိမ်းချမ်းရေးနေ့ လှုပ်ရှားမှု ဦးဆောင်သူတစ်ဦးဖြစ်တဲ့ Generation Wave အဖွဲ့က ကိုမိုးသွေးက RFA ကို ပြောပါတယ်။

"မနေ့တုန်းက ဦးဆောင်တဲ့ ၄ ယောက်ကို လှိုင်မြို့နယ်က ဆင့်ခေါ်ထားတယ်။ ပုဒ်မ ၁၈ နဲ့ အမှုဖွင့်ထားတယ် ဆိုတဲ့အကြောင်း အဲတာလာပြီးတော့ တွေ့ဆုံဖို့ ပြောထားတယ်။ စမ်းချောင်းမြို့နယ်ကတော့ ခဏနေ ကျွန်တော့်ကို စာလာပို့ပါလိမ့်မယ်။ ဆင့်ခေါ်စာလား ဘာလားမသိဘူး။ ရဲစခန်းက စာပို့မယ်လို့ပြောတယ်"

ရန်ကုန်မြို့မှာတော့ GW အဖွဲ့က ကိုမိုးသွေး၊ ကိုကျော်ဗိုဗို၊ မဖွေးယုမွန်၊ မခင်စန္ဒာညွန့်၊ ကချင်ငြိမ်းချမ်းရေး ကွန်ယက်အဖွဲ့က ဆရာဂျော်ဂွန်နဲ့ မအားခွန်၊ အနုပညာရှင်အုပ်စုက မဇွန်စပါယ်ဖြူတို့ တရားစွဲခံထားရတယ်လို့ ကိုမိုးသွေးက ပြောပါတယ်။

ရှမ်းပြည်နယ် တောင်ကြီးမှာ ကျင်းပခဲ့တဲ့ ငြိမ်းချမ်းရေးနေ့နဲ့ ပတ်သက်လို့လည်း ဦးဆောင်ခဲ့သူထဲက ၈၈ မျိုးဆက်ကျောင်းသားများ (ရှမ်းပြည်နယ်အဖွဲ့) က ကိုနေမျိုးနဲ့ ကိုအောင်သူ၊ အောင်ပန်းမြို့က ကိုဘိုဘိုဟန်တို့ကိုလည်း သက်ဆိုင်ရာ ရဲစခန်းတွေက ပုဒ်မ ၁၈ နဲ့ တရားစွဲလိုက်ပြီး လောလောဆယ်မှာ ငွေ ၁၀ သိန်းစီ အာမခံနဲ့ လွှတ်ပေးထားတယ်လို့ သိရပါတယ်။

ဒါ့အပြင် ပြည်မြို့မှာ ငြိမ်းချမ်းရေးနေ့ ကျင်းပဖို့ နေရာခွင့်ပြုခဲ့တဲ့ နှစ်ကျိပ်ရှစ်ဆူ တောင်ပေါ်ကျောင်း ဆရာတော်ဦးဝိမလ ကိုလည်း နောက်နောင် အခုလိုပါဝင် ပတ်သက်မှုမလုပ်ဖို့ တိုင်းသာသနာရေး ဦးစီးမှူးရဲ့ အစီအစဉ်နဲ့ ရပ်ကွက်သံဃာ့နာယက အဖွဲ့က ခေါ်ယူသတိပေးပြီး ခံဝန်ဂတိ လက်မှတ်ထိုးခိုင်းခဲ့တယ်လို့ သိရပါတယ်။

စက်တင်ဘာလ ၂၁ ရက်နေ့ကို အပြည်ပြည်ဆိုင်ရာ ငြိမ်းချမ်းရေးနေ့အဖြစ် ကျင်းပခဲ့တဲ့အပေါ် တည်ဆဲဥပဒေချိုးဖောက်မှုနဲ့ ရဲတပ်ဖွဲ့တွေက တရားစွဲလိုက်တာနဲ့ ပတ်သက်လို့ Generation Wave အဖွဲ့ ပြောခွင့်ရသူ ကိုမိုးသွေးကို RFA ဝိုင်းတော်သား ကိုနေရိန်ကျော် ဆက်သွယ်မေးမြန်းထားတာ နားဆင်နိုင်ပါပြီ။
http://www.rfa.org/burmese/news/peace-day-leaders-lawsuit-09222012101711.html

No comments:

Post a Comment