ondragstart="return false" onselectstart="return false"

Sunday, April 14, 2013

စက်ရုပ်ဘဝနဲ့ ဝစီပိတ် တပ်မတော်သား ကိုယ်စားလှယ်များ - အပိုင်း (၁) (၂)


နေပြည်တော်ရှိ လွှတ်တော်အတွင်း တပ်မတော်သား အရာရှိ ကိုယ်စားလှယ်များ

စည်းလုံးခြင်းရဲ့အင်အား ဝက်ဘ်ဆိုဒ်မှာ တင်ပြခဲ့တဲ့ သတင်းများကို ဖတ်ရှုလိုက်ရတဲ့ လွှတ်တော်အတွင်းရှိ တပ်မတော်သား ကိုယ်စားလှယ် အရာရှိတစ်ဦးက သူတို့ဟာ ပြုပြင်ပြောင်းလဲ ပွင့်လင်းမြင်သာ ခေတ်ကြီးထဲမှာ ဝစီပိတ်ကျင့်နေကြရပုံနဲ့ စက်ရုပ်ဘဝ ရောက်နေကြရပုံတွေကို ရင်ဖွင့်သွားပါတယ်။ ၂၀၁၀ ခုနှစ် ရွေးကောက်ပွဲ ကျင်းပပြီး ဖွဲ့စည်းပုံအခြေခံ ဥပဒေအရ ၂၅% သော တပ်မတော်အရာရှိ အမည်စာရင်းများကို တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင် (တပ်ချုပ်) က အမျိုးသားလွှတ်တော်နဲ့ ပြည်သူ့လွှတ်တော်များမှာ တက်ရောက်ခွင့် တင်သွင်းခဲ့ပါတယ်။ တပ်ရဲ့ ထုံးစံအတိုင်း တပ်သစ် ဖွဲ့စည်းမည် ဆိုပါက တပ်ဟောင်းက ဆိုးသွမ်းသူ၊ သုံးမရသူ၊ ဂဏန်းသွား ကန့်လန့်တိုက်သူများ၊ မလုပ်မရှုပ် မပြုတ်တဲ့ ရာထူးမတက်သူများကို တွန်းပိုးလေ့ ရှိကြပါတယ်။ အဲဒီ အစဉ်အလာအတိုင်း လွှတ်တော်အတွင်း တာဝန်ထမ်းဆောင်ကြရမဲ့ အရာရှိစာရင်းကို လက်အောက်တပ်များက တပ်ချုပ်ထံ အဆိုပါ ဂုဏ်အင်္ဂါရပ် ဝိသေသထူးများနဲ့ ပြည့်စုံသူများကိုသာ ရွေးချယ်ကာ တင်ပြပေးခဲ့ကြပါတယ်။ စည်းလုံးခြင်းရဲ့အင်အားက လွှတ်တော်အတွင်း တာဝန်ထမ်းဆောင်ခဲ့တဲ့ တပ်မတော် (လေ) မှ အရာရှိများအကြောင်း တင်ပြခဲ့ဖူးပါတယ်။

ဒါပေမဲ့ လွှတ်တော်အတွင်းကို ရောက်ရှိခဲ့ကြတဲ့ အဆိုပါ အရာရှိများဟာ စစ်တပ်ထဲမှာလို လျော့တိလျော့ရဲ ပြုမူနေထိုင်ခြင်း မရှိကြတော့ဘဲ တက်ကြွစွာ ဆွေးနွေးကြပါတယ်။ လွှတ်တော်အမတ်များရဲ့ စောင့်ကြည့်မှုကို ခံရလို့ သူတို့ရဲ့ ဂုဏ်သိက္ခာ အထူးသဖြင့် တပ်မတော်အပေါ် အထင်သေးမှာ စိုးရိမ်ပြီး အားထည့်လုပ်ကိုင်လာတယ်လို့ သုံးသပ်ရပါတယ်။ ယုံကြည်ချက်ကြောင့် အကျဉ်းကျနေသူများနဲ့ နိုင်ငံရေး အကျဉ်းကျနေသူများအား ပြန်လည်လွှတ်ပေးရေးကို ထောက်ခံဆွေးနွေး မဲပေးခဲ့ကြရာ လွှတ်တော်အမတ်များကပင် အံ့သြကုန်ကြပါတယ်။ နိုင်ငံရေးပါတီများမှ ကိုယ်စားလှယ်များနဲ့ ရင်းနှီးလာကြပြီး အပြန်အလှန် ဆွေးနွေးကြ၊ အမြင်ချင်းဖလှယ်ကြကာ ယုံကြည်မှု တည်ဆောက်ခဲ့ကြလို့ ဒီမိုကရေစီရဲ့ အနှစ်သာရ ထင်ဟပ် ပေါ်လွင်လာကြပါတယ်။ ဒါကို တပ်ချုပ်တစ်ယောက် စိတ်ပူပန်ဟန် တူလာပြီး သူတို့ကို နိုင်ငံတော်ကာကွယ်ရေး တက္ကသိုလ်ကျောင်းဆင်း ဗိုလ်မှူးကြီးများ အပါအဝင် အရာရှိကြီးများနဲ့ လဲလှယ်လိုက်ပါတယ်။

အထူးသဖြင့် ဒေါ်အောင်ဆန်းစုကြည် လွှတ်တော်အတွင်း စတင် ရောက်ရှိလာတဲ့အချိန်မှာ ဖြစ်ပါတယ်။ ဆက်လက်ပြီး သမ္မတနှင့် လွှတ်တော်အကြား အခြေခံဥပဒေ ခုံရုံးဥက္ကဋ္ဌ ဗိုလ်ချုပ်သိန်းစိုး (DSA - 16) တို့ အဖွဲ့အား ပြည်ထောင်စုအဆင့် ထားသင့်/ မသင့် သဘောထား ကွဲလွဲခဲ့ရာ တပ်မတော်သား ကိုယ်စားလှယ် အများစုက နိုင်ငံတကာ ဖွဲ့စည်းပုံများနဲ့ နှိုင်းယှဉ်ကာ ဇယားကားချပ်များနဲ့ စနစ်တကျ ဝင်ရောက်ဆွေးနွေး ဝေဖန်ခဲ့ပါတယ်။ ဒါကိုမကြိုက်တဲ့ အစိုးရနဲ့ လွှတ်တော်မှ ဗိုလ်ချုပ်ဟောင်း တချို့က တပ်ချုပ်ထံ တိုင်ကြားဟန်တူပြီး နောက်ပိုင်းမှာ လွှတ်တော်ထဲတွင် လွှတ်တော်အမတ်များ တင်လာတဲ့ အဆိုများနဲ့ မေးခွန်းများကို ထောက်ခံခြင်း၊ ကန့်ကွက်ခြင်း၊ ဝေဖန်ခြင်း၊ တော်ရုံတန်ရုံ မပြုလုပ်ကြဖို့ တပ်မတော်သား ကိုယ်စားလှယ်တွေကို တပ်ချုပ်က သတိပေးခဲ့တယ်လို့ စစ်ဖက်နီးစပ်သူများက ဆိုပါတယ်။

တပ်မတော်သား ကိုယ်စားလှယ် အရာရှိတစ်ဦးဟာ စည်းလုံးခြင်းရဲ့အင်အား ဝက်ဘ်ဆိုဒ်ထံ ရီရီမောမော ပြောလိုက်တာကတော့ “ကျွန်တော်တို့က လွှတ်တော်အတွင်း သွားလာပြုမူ ပြောဆိုနေထိုင်တာ သတိနဲ့နေရတာဗျ။ တော်ကြာ ဒေါ်အောင်ဆန်းစုကြည်ကို အပြုံးနဲ့နှုတ်ဆက်မိလို့ CCTV ကင်မရာက ဖြစ်စေ၊ လိုင်းပျောက် အသံဖမ်းစက်က တွေ့သွားလို့ ဖြစ်စေ၊ ကြားသွားလို့ ရှိရင်တော့ နောက်နေ့ကျ ပြောင်းရင်ပြောင်း၊ မပြောင်းရင် ထုထောင်းခံရတာမျိုး ရှိနိုင်တယ်ဗျ” လို့ ဆိုသွားပါတယ်။ အဲဒီလိုအခြေအနေ ရုတ်ချည်းပြောင်းလဲသွားတာဟာ တပ်မတော်မှ လွှတ်တော်ကိုယ်စားလှယ်များကို တကူးတက စေလွှတ်ရန် မလိုတော့ဘဲ သဘောထားမှတ်ချက် တပ်ချုပ်ထံ တောင်းခံရုံသာရှိပါတယ်။ ဖင်ညောင်းခံကာ အချိန်ကုန်ခံပြီး အရာရှိများက သူများတွေ ပြောဆိုတာကိုသာ နားထောင်ရုံသက်သက်ဆိုပါက သဘာဝမကျတဲ့အပြင် ပြည်သူလူထု အနေနဲ့ အမြင်ကြည်လင်မှု ရရှိဦးမှာ မဟုတ်ကြောင်း စစ်ဘက်နီးစပ်သူများက ဆိုပါတယ်။ အဆိုပါ ဖြစ်စဉ်နဲ့ စပ်လျဉ်းပြီး ဝေဖန်ထောက်ပြ ဆွေးနွေးချက်များ ထပ်မံ ၀င်ရောက်ရန်ရှိရာ ဆက်လက် တင်ပြပေးသွားပါမယ်။

စက်ရုပ်ဘဝနဲ့ ဝစီပိတ် တပ်မတော်သား ကိုယ်စားလှယ်များ - အပိုင်း (၂)

လွှတ်တော်အတွင်း တပ်မတော်အရာရှိများ ယခင်ကလို လွတ်လပ်တက်ကြွစွာ ဆွေးနွေးခွင့် မရရှိတဲ့အပေါ် စစ်ဖက်နီးစပ်သူများက ဝေဖန်လာပါတယ်။ တပ်မတော်မှ အငြိမ်းစားယူသွားသော အရာရှိကြီးတစ်ဦးက ဒီဖြစ်စဉ်အပေါ် ဝေဖန်ကြည့်ရာမှာ “တပ်ချုပ်အနေနဲ့ တပ်မတော်နေ့ အခမ်းအနားမှာ ပြောထားတာ ရှိတယ်ဗျာ။ အမျိုးသားရေး ဦးဆောင်မှု အခန်းကဏ္ဍမှာ တပ်မတော်က ပါဝင်ရမည်ဆိုရင် နိုင်ငံရေးပါတီများမှ ကိုယ်စားလှယ်များနဲ့ တန်းတူရင်ဘောင်တန်း ယှဉ်ရဲရမယ်ဗျ။ နိုင်ငံရေး၊ စီးပွါးရေး၊ စစ်ရေး၊ သံတမန်ရေးရာဆက်ဆံရေး၊ တိုင်းရင်းသားရေးရာတွေမှာ အရပ်သားတွေ မသိနိုင်လောက်တဲ့ အတွေ့အကြုံတွေကို နိုင်ငံတော်အတွက် စေတနာထားပြီး ရှင်းပြရဲရမယ်၊ လွှတ်တော်အတွင်း တပ်မတော် အရာရှိတွေကို အတိုင်းအတာ တစ်ခုထိ အကန့်အသတ်ဖြင့် ဝေဖန် ဆွေးနွေး ပိုင်ခွင့် မပေးရင်တော့ နိုင်ငံတကာနှင့် ပြည်သူလူထုက တပ်မတော်ရဲ့ အထူးသဖြင့် အရာရှိတွေရဲ့ ဦးဆောင်မှု ခေါင်းဆောင်မှု အင်္ဂါရပ် အရည်အသွေးတွေကို Credit ပေးခွင့်ရမှာ မဟုတ်သလို တပ်မတော်ရဲ့ ပုံရိပ် Image ကိုလည်း တွေ့မြင်ကြမှာ မဟုတ်ဘူးဗျာ”။

ဆက်လက်ပြီး စစ်ရုံးမှ တပ်မတော် အရာရှိ တစ်ဦးကို ဆက်သွယ် မေးမြန်းခဲ့ပါသေးတယ်။ “တပ်ချုပ်က သူ့ရဲ့တပည့်တွေ လွှတ်တော်မှာ ဝင်ရောက် ဆွေးနွေးခဲ့ရင် နိုင်ငံရေးပါတီတွေနဲ့ တိုင်းရင်းသားတွေရဲ့ အမြင်မကြည်လင်တာမျိုး ဖြစ်ပေါ်သွားမှာကို စိုးရိမ်ဟန်တူတယ်။ သူတို့က တပ်ချုပ်ကိုယ်စား ပြောနေတဲ့အသွင်မျိုး တပ်ချုပ်ရဲ့ အာဘော် (၀ါ) တပ်မတော်ရဲ့ အာဘော်လို့ ထင်မြင်သွားမှာ စိုးတယ်လို့ ထင်တယ်ဗျ”

ဒါပေမဲ့ တပ်မတော် အငြိမ်းစား အရာရှိကြီးကို ဒါနဲ့ ပတ်သက်ပြီး စည်းလုံးခြင်းရဲ့အင်အား ဝက်ဘ်ဆိုဒ်က မေးမြန်းခဲ့ရာ သူက အောက်ပါအတိုင်း ဆိုပါတယ်။ “တကယ်တော့ စစ်တပ်က လူကြီးတွေက လက်အောက်ကို မနာခံလိုတဲ့ သဘော။ မယုံတဲ့ သဘောဗျ။ ကျွန်တော်တို့ တပ်မှာ နေခဲ့တုန်းက နယ်စပ်မြို့မှာ အခြေစိုက်တဲ့ တပ်ရင်းဆိုတော့ နယ်စပ်က ကုန်သည်တွေ ဆက်ဆံပြောဆိုတာကို တပ်ရင်းမှူးက မကြိုက်ဘူးဗျ။ ဆိုလိုတာက ခြေရာတိုင်းတယ် ပေ့ါဗျာ။ ဖြစ်နိုင်ရင် ခပ်ဝေးဝေးက ရှောင်ခိုင်းတယ်။ တချို့ဆို တပ်ရင်းမှူးကတော်က သက်ဆိုင်ရာအရာရှိရဲ့ မိန်းမကတဆင့် လှည့်ပြောခဲ့တယ်။ တကယ်တော့ တပ်ရင်းမှူးက သူ့စားကွက်တွေကို ကုန်သည်တွေက သိထားပြီးပြီမို့ လက်အောက်ခံ အရာရှိတွေ သိသွားမှာ စိုးရိမ်လို့နဲ့ တူတယ်။ လက်ရှိ လွှတ်တော် တပ်မတော်သား ကိုယ်စားလှယ်တွေကိုလည်း တပ်ချုပ်က ချုပ်ချယ် ကန့်သတ်တာဟာ ရှေးရိုးစွဲနေတဲ့ အာဏာရှင်ဆန်တဲ့ သဘောဖြစ်တယ်။ ဒေါ်အောင်ဆန်းစုကြည် အပါအ၀င် အတိုက်အခံပါတီ ကိုယ်စားလှယ်တွေနဲ့ တပ်မတော် ကိုယ်စားလှယ်အရာရှိတွေ ပူးပေါင်းသွားမှာ စည်းရုံးခံရမှာ စိုးရိမ်တယ်ဆိုရင် ပိုမှန်မယ်”။

အဲဒီလို တပ်ချုပ်က လွှတ်တော်အတွင်း သူ့ရဲ့အရာရှိများ မကြာခဏ လဲလှယ်နေတာကို လွှတ်တော်ရှိ နိုင်ငံရေးပါတီ ကိုယ်စားလှယ် အများစုက ကန့်ကွက်ခဲ့ကြပြီး လွှတ်တော် သက်တမ်းနဲ့အညီ ထားသင့်ကြောင်း အမည်စာရင်း မတင်ခင် သေသေချာချာ စီစစ်ပြီးမှ လွှတ်သင့်ကြောင်း ပြောဆိုခဲ့ပါတယ်။ လွှတ်တော်ကို တပ်ချုပ်က အလေးမမူ ဂရုမထားတဲ့ အသွင်သဏ္ဍာမျိုး မလုပ်သင့်ကြောင်း၊ တကယ်တမ်း တပ်မတော်သား အရာရှိများက လွှတ်တော်အတွင်း တပ်ချုပ်ရဲ့ မူဝါဒဖြစ်တဲ့ ဒို့တာဝန် အရေးသုံးပါး ထိခိုက်လာမဲ့ အခြေခံဥပဒေကို ပြုပြင်မဲ့ ကိစ္စမျိုးကိုကျတော့ အထက်လူကြီးအပေါ် သစ္စာရှိရှိနဲ့ လက်ခံကြမှာ မဟုတ်ပါကြောင်း၊ တပ်မတော်နေ့ အခမ်းအနားမှာ ဒေါ်အောင်ဆန်းစုကြည် တက်ရောက်အားပေးတဲ့အတွက် တပ်မတော်သားအားလုံးက ၀မ်းသာအားရ ကြိုဆိုခဲ့ကြကြောင်း၊ ဒါကြောင့် လွှတ်တော်အတွင်း ယခင်ကလို တပ်မတော်အရာရှိ ကိုယ်စားလှယ်များကို လွတ်လွတ်လပ်လပ် ဆွေးနွေးခွင့် ဖွင့်ပေးသင့်ကြောင်း၊ ဒါမှ ပြည်သူနဲ့တပ်မတော် တသားတည်း ရှိသွားမှာဖြစ်ကြောင်း စစ်ဖက်နီးစပ်သူများက ဝေဖန် ထောက်ပြသွားကြပါတယ်။
http://photayokeking.org/breaking-news/1160-the-military-parliment-members-unauthorized-to-talk-anymore-2

No comments:

Post a Comment