ondragstart="return false" onselectstart="return false"

Monday, March 10, 2014

UNFC နဲ့ NCCT သို့ အိတ်ဖွင့်ပေးစာ

UNFC နှင့် NCCT ခေါင်းဆောင်များခင်ဗျား။ ။ ဆုပ်မိထားတဲ့ ဓားရိုးကို လက်မလွတ်စေနဲ့ လို့ဦးစွာအားပေးလိုပါတယ်။

တိုင်းရင်းသားခေါင်းဆောင်များဟာ ဗိုလ်ချုပ်အောင်ဆန်းနဲ့ နိုင်ငံရေးအရ တန်းတူရည်တူ တိုင်ပင်ဆွေးနွေး အပေးအယူ လုပ်ကြပြီး ပင်လုံစာချုပ်နဲ့ ပင်လုံစိတ်ဓာတ်အရ အမျိုးသားများ တန်းတူရည်တူ စစ်မှန်တဲ့ဖက်ဒရယ်ပြည်ထောင်စုနိုင်ငံတည်ဆောက်ဖို့ အခြေခံအုတ်မြစ်ကို ချမှတ်ပေးနိုင်ခဲ့လို့ အင်္ဂလိပ်ဆီက လွတ်လပ်ရေးကို အမိအရဆွတ်ခူးပေးနိုင်ခဲ့တာကြောင့် ဒီနေ့အထိ ပြည်သူများက လေးစားဂုဏ်ပြုနေတာ အားလုံးအသိပင်ဖြစ်တယ်။

ဗိုလ်ချုပ်ကျဆုံးပြီးနောက် ဖဆပလအဖွဲ့ချုပ်ဟာ ပင်လုံစိတ်ဓာတ်အခြေခံမူအပေါ် သွေဖီ အားနည်းသွားလို့ ၁၉၄၇ ခု ဖွဲ့ စည်းပုံအခြေခံဥပဒေရေးဆွဲတဲ့အခါ၊ 'ဗိုလ်ချုပ်ချပေးထားတဲ့ မူအတိုင်းဆိုရင် လူအင်အား အများကြီးကုန်မယ်၊ စစ်ဒဏ် ကြောင့်ဘဏ္ဍာရေးအားနည်းနေတယ်၊ အခန်း (၁၀) မှာ ခွဲထွက်ခွင့်ပါတယ်၊ အခန်း (၁၁) မှာ ပြင်ဆင်ခွင့်ပေးထားတယ်၊ ဖွဲ့စည်းပုံအတည်မပြုရင် လွတ်လပ်ရေးမရနိုင်ဘူး' ဆိုပြီး လက်တလုံးခြားလှည့်ကွက်ဆင်ပေးလိုက်တဲ့အပေါ်မှာ တိုင်းရင်းသားခေါင်းဆောင်တွေက 'ဟုတ်တာဘဲ၊ စစ်ဒဏ်ကြောင့် တိုင်းပြည်ဆင်းရဲနေတယ်၊ ခွဲထွက်ခွင့်လည်းပါတယ်၊ ပြင်ဆင်ခွင့်လည်းရှိတယ်၊ ညီအစ်ကိုချင်းမို့ ဈေးဝယ်သလို ဈေးဆစ်စရာမလိုဘူး၊ ဖွဲ့စည်းပုံအတည်မပြုရင် လွတ်လပ်ရေးမရနိုင်ဘူး၊ ဒါဆိုရင် အားလုံးမှန်တာဘဲ' ဆိုပြီး ဖဆပလအပေါ် ယုံကြည်မှုလွန်ကဲ၊အကောင်းမြင်ဝါဒ များလွန်းလို့ ဖွဲ့စည်းပုံအခြေခံဥပဒေကို သဘောတူအတည်ပြုလိုက်တယ်။ ဒီလိုနဲ့ဖားတပိုင်းငါးတပိုင်းပြည်ထောင်စု လက်အောက်ခံဘဝ ရောက်သွားတာကိုလည်း အားလုံးသိပြီးဖြစ်တယ်။

၁၉၅၈ ခု လက်နက်နဲ့ဒီမိုကရေစီလဲလှယ်ရေး၊ နဲ့ ၁၉၆၃ ခု ငြိမ်းချမ်းရေးဆွေးနွေးပွဲ လုပ်လိုက်တာလည်းကလိမ်စေ့ အကွက် သက်သက်ဖြစ်ပြီး အကြွင်းမဲ့လက်နက်ချခိုင်းတာ ဖြစ်တယ်။

နဝတ/နအဖဟာ ၁၉၉၀ ခုနောက်ပိုင်း အပစ်အခတ်ရပ်စဲပြီး နိုင်ငံရေးဆွေးနွေးမယ်လို့ လှည့်စားကာ တိုင်းရင်းသားတော်လှန်ရေး အဖွဲ့တွေကို အတုအယောင်အမျိုးသားညီလာခံထဲ တွန်းထည့်လိုက်တယ်။ တိုင်းရင်းသားလက်နက်ကိုင်တော်လှန်ရေးအဖွဲ့ ၁၃ ဖွဲ့ တင်ပြထားတဲ့ အမျိုးသားများတန်းတူရည်တူ ဖက်ဒရယ်ပြည်ထောင်စုနိုင်ငံတည်ဆောက် ရေး အခြေခံမူစာတမ်းကို မိုက်ရိုင်းစွာကြိမ်းဝါးစော်ကားပြီး အမှိုက်ပုံးထဲ ပစ်ထုတ်လိုက်တယ်။ အပစ်အခတ်ရပ်စဲထားတဲ့ အဖွဲ့အစည်းအားလုံး နည်းမျိုးစုံနဲ့ သပ်သျှိုဖြိုခွဲခံလိုက်ရတယ်။ တချို့အဖွဲ့ဆိုရင် လုံးဝဖျက်ဆီးခံရလို့ မိမိအမျိုးသားဘဝ တခုလုံး ရေစုံမျောသွားတယ်။ အဲ့ဒီလိုဖြစ်ရတာဟာ မျက်နှာပူစရာမဟုတ်ဘဲနဲ့မျက်နှာပူအားနာတတ်လွန်းခြင်း၊ ရိုးလွန်းလို့အ,ရာကျသွားခြင်းနဲ့ အချို့ပုဂ္ဂိုလ်များဟာ အမျိုးသားရေးထက်မိမိကိုယ်ကျိုးရှာခြင်း စတဲ့ပျော့ညံ့မှားယွင်းတဲ့ ရပ် တည်ချက်များကြောင့်ဖြစ်ကြောင်းကို တိုင်းရင်းသားတွေ နှစ် ၆၀ ကျော်ဖြတ်သန်းလာရတဲ့ဘဝအရ ရင်နင့်ဖွယ် အလီ လီ ကြုံတွေ့ခံစားနေရလို့ သင်ခန်းစာ ကောင်းကောင်းကြီးရကြပြီဖြစ်တယ်။

နအဖစစ်အုပ်စုဟာ ပြည်သူတရပ်လုံး ကျွန်ပြုထားတဲ့ ၂၀၀၈ ခု ဖွဲ့စည်းပုံအခြေခံဥပဒေကို အတင်းအဓမ္မအတည်ပြုလိုက်ပြီးနောက်ပိုင်းမှာ တိုင်းရင်းသားလက်နက်ကိုင်တော်လှန်ရေးအဖွဲ့အစည်းတွေကို အကြွင်းမဲ့လက်နက်ချရေးဖြစ်တဲ့ နယ်ခြားစောင့်တပ်နဲ့ ဌာနေပြည်သူ့စစ် လုပ်ဖို့ ရာဇသံ ၃ ကြိမ်ထုတ်ပြန်ခဲ့တယ်။ အဖွဲ့ငယ်လေး ၂ ဖွဲ့-၃ ဖွဲ့ကလွဲပြီး ကျန် တဲ့အဖွဲ့တွေ လက်မခံ အာခံနေကြလို့ လက်လျှော့လိုက်ရတယ်။ အဲ့သလိုတိုင်းရင်းသားတွေ ညီညွတ်ရင် စစ်အုပ်စုက ဘာမှမတတ်နိုင်ဘူး ဆိုတာကို လက်တွေ့ပြလိုက်တာဖြစ်ပြီး အင်မတန်ဂုဏ်ယူထိုက်တဲ့ စံနမူနာကောင်းဖြစ်တယ်။

ဒီကနေ့သမတ ဦးသိန်းစိန်အစိုးရက တပြည်လုံးငြိမ်းချမ်းရေး အကြောင်းပြပြီး တိုင်းရင်းသားလက်နက်ကိုင်အဖွဲ့အစည်း တဖွဲ့ချင်းလှည့်စားဖို့ ကြိုးစားပြန်တယ်။ တဖွဲ့ချင်း ပြည်နယ်အဆင့်ငြိမ်းချမ်းရေး၊ ပြည်ထောင်စုအဆင့်ငြိမ်းချမ်း ရေး ဆိုပြီး တိုင်းရင်းသားတွေ ညီညွတ်မှုမရအောင် အခွင့်အရေးအမျိုးမျိုးပြပြီးသပ်သျှိုဖြိုခွဲနေတယ်။ အဲ့ဒီကောက်ကျစ် စဉ်းလဲတဲ့အကြံအပေါ် ဆယ်ခါသေဖူးတော့ ပျဉ်ဖိုးကောင်းကောင်းကြီးသိကြတဲ့ တိုင်းရင်းသားလက်နက်ကိုင်တော်လှန် ရေးအဖွဲ့အစည်းတွေဟာ UNFC ကို ဖွဲ့စည်းလိုက်တယ်။ အဲ့သလိုUNFC ထဲကတိုင်းရင်းသားတွေကို တဖွဲ့ချင်းခေါ်တွေ့ လိုက်၊ တဖွဲ့ချင်းလိုက်တွေ့လိုက် နည်းမျိုးစုံနဲ့ဖြိုခွဲလို့မရတဲ့အဆုံးမှာ ငါတို့ဟာ တပြည်လုံးငြိမ်းချမ်းရေးရပြီဆိုပြီး အမြတ် ထုတ်ဖို့ UN-USA-EU ကိုယ်စားလှယ်ခေါင်းဆောင်တွေရှေ့မှာ လက်မှတ်ထိုးကြမယ်ဆိုတဲ့ ဉာဏ်နီဉာဏ်နက်နဲ့အစီ အစဉ်တရပ်ကို လုပ်လာပြန်တယ်။

UNFCဟာ နွားကွဲရင် ကျားဆွဲမယ်ဆိုတာကို ကောင်းကောင်းကြီးသဘောပေါက်တယ်။ အဲဒါကြောင့် တိုင်းရင်းသားတို့ဘဝကို အာမခံချက်ပေးနိုင်မယ့် ပင်လုံစိတ်ဓာတ်အခြေခံမူအရ UNFC ရဲ့ ပထမအကြိမ်ကွန်ဖရင့်သဘောတူညီ ချက်မှာ ၂၀၀၈ ခု ဖွဲ့စည်းပုံ အခြေခံဥပဒေကို လက်မခံ ပယ်ချလိုက်ပြီး အမျိုးသားများတန်းတူဖက်ဒရယ်ပြည်ထောင်စု သမတနိုင်ငံ ဖွဲ့စည်းပုံအခြေခံ ဥပဒေ မူကြမ်းကိုလည်း ရေးဆွဲသွားဖို့ချမှတ်ထားပြီးဖြစ်တယ်။ ဒါကြောင့် တိုင်းရင်းသား လက်နက်ကိုင်တော်လှန်ရေး အဖွဲ့အစည်းတွေရဲ့ပထမအကြိမ် လိုင်ဇာကွန်ဖရင့်မှာ နိုင်ငံရေးပြဿနာကို နိုင်ငံရေးနည်း နဲ့ တွေ့ဆုံဖြေရှင်းပြီးမှ တတိုင်းတပြည် လုံးငြိမ်းချမ်းရေး လက်မှတ်ရေးထိုးမယ်လို့ တညီတညွတ်တည်း သဘောတူဆုံး ဖြတ်ချမှတ်လိုက်တယ်။ မြစ်ကြီးနားကျမှ အရင်ပြည်ထောင်စုငြိမ်း ချမ်းရေးဖော်ဆောင်မှုကော်မတီ(UPMC)ရဲ့စာတမ်း မဟုတ်တော့ဘဲ မင်းသားခေါင်းစွပ် ဘီလူးခေါင်းဖြစ်တဲ့ ကာချုပ်ကိုယ်စား ဒုဗိုလ်ချုပ်ကြီးမြင့်စိုးကအကြွင်းမဲ့လက်နက်ချ ရေးစာချုပ်မူကြမ်းကို ထုတ်ပြလာတယ်။ အဲဒီစာတမ်းကို UNFC က ချက်ခြင်းပယ်ချ လိုက်တယ်။ အဲဒါကြောင့် ဘယ်သူ က ငြိမ်းချမ်းရေးအစစ်အမှန်လိုလားပြီး ဘယ်သူက ဉာဏ်နီဉာဏ်နက်ထုတ် အနိုင်ကျင့်တာလဲဆိုတာကို ပြည်သူ ပြည်သားတွေနဲ့ နိုင်ငံတကာက သိမြင်သွားကြတယ်။ အဲဒါကြောင့် UNFC ဟာ ငြိမ်းချမ်းရေးဖြစ်စဉ်မှာ ဓားရိုးဘက်၊ ဓမ္မဘက်၊ တရားဘက်က ဆုပ်မိထားပြီးဖြစ်တာကို အားလုံးယုံကြည်ထားကြဖို့လိုတယ်။

အဲဒီလို လိုင်ဇာကွန်ဖရင့်သဘောတူညီချက် ရရှိတဲ့နောက်ပိုင်းမှာ UPMC ကိုယ်စားလှယ်အဖွဲ့ဟာ UNFC ဆီ ခဏခဏ သွားတွေ့ တယ်။ ကရင်နှစ်သစ်ကူးပွဲကိုလည်း သွားတက်တယ်။ ကိုယ့် ကိုယ်ကို အပေါ်စီးလို့ခံယူထားတဲ့အဖွဲ့ဟာ အဲသလို မထင်မှတ်ဘဲ လုပ်လာတာ ချစ်လို့လား၊ လည်မျိုညှစ်ဖို့လား ဆိုတာအားလုံးသိကြပြီးဖြစ်တယ်။

UNFC ဟာ တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ ဒုတိယအကြိမ်ကွန်ဖရင့်ကို လော်ခီးလာမှာကျင်းပပြီး လိုင်ဇာသဘောတူညီချက်အပေါ် ထပ်ဆင့်သဘောတူချမှတ်လိုက်တယ်။ ဒီလို တိုင်းရင်းသားတွေ ပိုမိုစည်း လုံးညီညွှတ်မှု တည်ဆောက်နိုင်ခြင်းအပေါ် အထူးဂုဏ်ယူမိကြောင်း ဖော်ပြအပ်ပါတယ်။

အခုအခါ သမတ ဦးသိန်းစိန်နဲ့ ဦးအောင်မင်း ဦးဆောင်တဲ့ UPMC အဖွဲ့ဟာ အကြောင်းအမျိုးမျိုးပြပြီး UNFC ကို နည်း မျိုးစုံနဲ့ ချဉ်းကပ်လာတယ်၊ ခေါ်ယူတွေ့ဆုံတယ်။ အထူးသဖြင့် တဖွဲ့ချင်းကိုခတ်စိတ်စိတ်ခေါ်တွေ့လာတဲ့အပေါ် UNFC အနေနဲ့သော် လည်းကောင်း၊ NCCT အနေနဲ့သော်လည်းကောင်း၊တဖွဲ့ချင်းသော်လည်းကောင်း၊ ပုဂ္ဂိုလ်တဦးချင်းသော် လည်းကောင်း အထူးသတိရှိရမှာဖြစ်ကြောင်း ပွင့်လင်းစွာသတိပေးလိုက်ပါတယ်။ သမတရဲ့သဘောတူညီချက် အရဆိုပြီး ပြည်ထောင်စု အင်စတီကျုရုံး ဖွင့်ထားတယ် ဆိုတဲ့လုပ်ရပ်တွေက ငြိမ်းချမ်းရေးကို အထောက်အကူပြုတာ လား၊ ကိုယ်ကျိုးအခွင့်အရေး သမားတွေလား၊ UNFC ကိုဖြိုခွဲရေးလုပ်ငန်းဘဲ ဖြစ်မှာလားဆိုတာကိုလည်း အလေးအနက် သတိထားကြရမှာဖြစ်တယ်။

UNFC-NCCT ခေါင်းဆောင်များခင်ဗျား

ဒီနေ့ငြိမ်းချမ်းရေးဖြစ်စဉ်မှာ တိုင်းရင်းသားခေါင်းဆောင်များဟာ ဓားရိုးဘက် ဆုပ်ကိုင်ထားမိပြီးဖြစ်လို့ လက်မလွှတ်ဘဲ အမျိုးသားများတန်းတူရည်တူ စစ်မှန်တဲ့ ဖက်ဒရယ်ပြည်ထောင်စု တည်ဆောက်ရေး နိုင်ငံရေးအခြေခံမူကိုတိုင်းသူ ပြည်သားများ နဲ့ နိုင်ငံတကာက သိရှိလာကြတဲ့အထိ စွဲမြဲစွာရပ်တည်ပြီး ငြိမ်းချမ်းရေးလုပ်ငန်းကို စိတ်ရှည်လက်ရှည်နဲ့ အောင်မြင်တဲ့အထိ စည်းလုံးညီညွှတ်စွာ ချီတက်ကြပါစို့လို့ လေးနက်တည်ကြည်စွာ တိုက်တွန်းလိုက်ပါကြောင်း။ ။

ဒီမိုကရေစီရေး နဲ့ အမျိုးသားများတန်းတူရေး တပြိုင်တည်းအောင်ပွဲခံရမည်။


ဒီမိုကရေစီရေးနှင့်အမျိုးသားများတန်းတူရေး

ပူးပေါင်းဆောင်ရွက်မှု လုပ်ဖော်ကိုင်ဖက်များ

၂၀၁၄ ခု မတ်လ ၉ ရက်

2 comments:

Blogger said...

ဒီမိုကရေစီရေးနှင့်အမျိုးသားများတန်းတူရေး ပူးပေါင်းဆောင်ရွက်မှု လုပ်ဖော်ကိုင်ဖက်များ
နဲ့ ဆက်သွယ်နိုင်မဲ့ အီးမေးလ် လိပ်စာဖေါ်ပြပေးပါရန်..

ဇင်ယော် said...

gamanii@gmail.com

Post a Comment