ondragstart="return false" onselectstart="return false"

Saturday, April 12, 2014

သန်းခေါင်စာရင်း နဲ့ မွတ်စလင်ဦးရေ

ဦးအောင်ခင်, ကျော်ကျော်သိန်း

ကုလသမဂ္ဂအကူအညီနဲ့ သန်းခေါင်စာရင်း ပြုစုရာမှာ စာရင်းမကောက်နိုင်လို့ ကျန်နေတဲ့နေရာနဲ့ တမင်ချန်ထားတဲ့ နေရာတွေရှိတဲ့အတွက် တိုင်းရင်းသားအချို့ နဲ့ မွတ်စလင်ဦးရေကို ရေတွက်ဖို့ အခက်အခဲရှိနိုင်ပါတယ်။ ဒီနေရာမှာ ရှိပြီးသာမြို့ နယ် လူဦးရေစာရင်းကို အားကိုးနိုင်ပါတယ်။ ဥပမာ မောင်တောမြို့ နယ် အုပ်ချုပ်ရေးဦးစီးဌာန မနှစ်က ထုတ်ပြန်တဲ့ ဒေသဆိုင်ရာ အချက်အလက်များ စာအုပ်လိုမှတ်တမ်းမှာ လူဦးရေစာရင်းကို တွေ့နိုင်ပါတယ်။ သန်းခေါင်စာရင်း မကောက်နိုင်သေးလို့ ကျန်နေတဲ့နေရာမှာလည်း ဒေသအခြေအနေကိုလိုက်ပြီး နောင်အခါမှာ လူဦးရေစာရင်း ကောက်ယူနိုင်ပါတယ်။

ပုံစံတခုတည်းကိုသာသုံးပြီး (၁၀) နှစ်တကြိမ် တိုင်းပြည်ကို ဓါတ်ပုံရိုက်တယ်ဆိုတဲ့ သန်းခေါင်စာရင်းနည်းဟာ အိမ်ထောင်စဘဝတည်ငြိမ်ပြီး မျိုးနွယ်တူတဲ့ လူအဖွဲ့အစည်းနဲ့သာ သင့်တော်တယ်လို့ ယူဆတဲ့ပညာရှင်နဲ့ အဖွဲ့အစည်းတွေ ရှိပါတယ်။ ဒီနည်းဟာ စရိတ်အကုန်အကျများပြီး လူမျိုးနွယ်ရှုပ်ထွေးတဲ့ ရွှေ့ ပြောင်းမှုများပြားတဲ့ လူ့အဖွဲ့အစည်းနဲ့ မသင့်တော်ဘူးလို့ ဆိုပါတယ်။ ဒါကြောင့် အရပ်ဒေသအလိုက် စာရင်းကောက်ယူတဲ့နည်းကို သုံးလာကြပါတယ်။ မြန်မာပြည်မှာလည်း ၂၀၁၄ သန်းခေါင်စာရင်းမှာမပါတဲ့ ဒေသတွေမှာ သင့်တော်တဲ့နည်းနဲ့ စာရင်းကောုက်ယူနိုင်လိမ့်မယ်လို့ မျှော်လင့်ရပါတယ်။

Harvard တက္ကသိုလ် Ash Center ဟာ ၁၉၅၃ သန်းခေါင်စာရင်းကို အခြေခံပြီး မြန်မာပြည်က မွတ်စလင်ဦးရေကို တွက်ပြတဲ့စာတမ်းကို လွန်ခဲ့တဲ့ ဇူလိုင်လမှာ ထုတ်ထားပါတယ်။ ၁၉၅၃ သန်းခေါင်စာရင်းဟာ မြို့ နယ်လူဦးရေကို အဓိကထားပြီး ကောက်ယူတဲ့စာရင်းဖြစ်လို့ ကျေးလက်လူဦးရေ အချို့ အဝက်သာ ပါဝင်ပါတယ်။ တပြည်လုံးမှာ လူဦးရေ သန်း (၂၀) ကျော်ရှိတဲ့အနက် မွတ်စလင်ဦးရေဟာ (၄) ရာခိုင်နှုန်း (သို့မဟုတ်) ရှစ်သိန်းကျော် ရှိတယ်လို့ ဆိုပါတယ်။ နောက်အနှစ် (၃၀) ကြာလို့ ၁၉၈၃ မှာ သန်းခေါင်စာရင်းကောက်တော့လည်း မွတ်စလင်ဦးရေဟာ တိုင်းပြည်လူဦးရေရဲ့  (၄) ရာခိုင်နှုန်းပဲ ရှိနေပါတယ်။ ဒါပေမဲ့ လူဦးရေက (၃၄) သန်းဖြစ်လာလို့ မွတ်စလင်ဦးရေဟာ (၁) သန်း (၄) သိန်းအထိ တိုးလာပါတယ်။ ဒါကြောင့် မွတ်စလင်က မြန်မာ့လူ့အဖွဲ့အစည်းကို လွှမ်းမိုးလိမ့်မယ်လို့ စိုးရိမ်တယ“ယုတ္တိမရှိဘူးလို့ ဆိုပါတယ်။

သမိုင်းသုတေသန ဦးစီးဌာန၊ ညွှန်ကြားရေးမှုး ဦးမြင့်သိန်း ရေးသားပြီး ၂၀၀၉ မတ်လမှာ ဖတ်ကြားတဲ့စာတမ်းမှာ ဘင်္ဂါလီမွတ်စလင်ဦးရေ ရခိုင်ဒေသမှာ တိုးပွားလာပုံကို တင်ပြထားပါတယ်။ မောင်တောမြို့ နယ်မှာ ၁၉၅၆ က မွတ်စလင်ဦးရေ (၁) သိန်း (၈) သောင်းကျော်ရှိပြီး၊ ၁၉၈၆ မှာ (၂) သိန်း (၆) သောင်းကျော် ဖြစ်လာတယ်လို့ ဆိုပါတယ်။ အနှစ် (၃၀) အတွင်း မွတ်စလင်ဦးရေ (၁) ဆခွဲ တိုးပွားလာတာ ဖြစ်ပါတယ်။ ၁၉၃၁ က မောင်တောမှာ မွတ်စလင် (၁) သိန်းကျော်သာရှိတာမို့ (၅၅) နှစ်အတွင်း (၂) ဆခွဲ တိုးပွားလာတဲ့ သဘောဖြစ်ပါတယ်။ ဘူးသီးတောင်မှာ ၁၉၄၂ က မွတ်စလင် တစ်ရာကျော်သာရှိပေမယ့် အနှစ် (၆၀) ကျော်လာတဲ့အခါ ၂၀၀၉ ခုနှစ်မှာ (၂) သိန်း (၈) သောင်းကျော် ရှိလာပါတယ်။ ဘင်္ဂါလီမွတ်စလင်တွေ ဝင်ရောက်လာလို့ လူမျိုးရေး အဓိကရုဏ်း ဖြစ်မှာကို ကိုလိုနီခေတ်ကတည်းက သတိပေးခဲ့ပါတယ်။

စစ်တကောင်းသားတွေ ဝင်နေတာကို ရခိုင်တိုင်းရင်းသားနဲ့ ဒေသခံမွတ်စလင်တွေက မနှစ်သက်တဲ့အတွက် လူမျိုးရေးပဋိပက္ခ ဖြစ်နိုင်တာကို ၁၉၃၉ စုံစမ်းရေးကော်မရှင်က သတိပေးခဲ့ပါတယ်။ ၂၀၁၂ ရောက်လာတော့ မောင်တောမြို့ နယ်ရဲ့  လူဦးရေ (၅) သိန်း (၁) သောင်းကျော်မှာ ၉၄ ရာခိုင်နှုန်းဟာ ဘင်္ဂါလီမွတ်စလင် ဖြစ်နေတယ်လို့ မကြာမီက ထုတ်ပြန်တဲ့ ဒုချီးရားတန်း စုံစမ်းရေးကော်မရှင် အစီရင်ခံစာမှာ ဖော်ပြပါတယ်။ မွတ်စလင် (၄) သိန်း (၈) သောင်းရှိပြီး ဗုဒ္ဓဘာသာ (၂) သောင်း (၇) ထောင် ရှိပါတယ်။ မောင်တောမြို့ နယ် လူဦးရေတိုးနှုန်းက (၂) ဒဿမ (၆) ရာခိုင်နှုန်းဖြစ်လို့ အခြားဒေသထက် ပိုများပါတယ်။ ရခိုင်ပြည်နယ် လူဦးရေးရဲ့  (၂၀) သို့မဟုတ် (၂၅) ရာခိုင်နှုန်းဟာ မွတ်စလင်ဖြစ်မယ်လို့ ခန့်မှန်းပါတယ်။ ဒီအချက်ကြောင့် မွတ်စလင် ဆန့်ကျင်ရေးလုပ်မယ်ဆိုတာမျိုးဟာ သဘာဝမကျဘူးလို့ မြင်ကြပါတယ်။

ရခိုင်နဲ့ ဘင်္ဂါလီ မျိုးနွယ်အဖွဲ့အစည်းအကြား ယုံကြည်မှုရှိလာအောင် အစိုးရအဖွဲ့အစည်းတွေအနေနဲ့ ဆောင်ရွက်သင့်တာတွေကို ဒုချီးရားတန်း စုံစမ်းရေးကော်မတီအစီရင်ခံစာမှာ ဖော်ပြထားပြီး ဖြစ်ပါတယ်။ စားဝတ်နေရေး ကျပ်တည်းတဲ့ စစ်အာဏာရှင်ခေတ်မှာ ဗုဒ္ဓဘာသာဝင်တွေ နိုင်ငံခြားထွက်ကြပြီး မွတ်စလင်တွေ ထွက်ခွါဖို့ ခက်ခဲတာဟာ မွတ်စလင်ဦးရေကို များပြားစေတဲ့ အကြောင်းရင်းတခု ဖြစ်နိုင်တယ်လို့ Ash Center စာတမ်းက သုံးသပ်ပါတယ်။ သန်းခေါင်စာရင်းထွက်လာရင် မွတ်စလင်ဦးရေ တိုးပွားလာတာကို တွေ့ရင်လည်း တွေ့နိုင်ပါတယ်။ ဒါဟာ မွတ်စလင်ဆန့်ကျင်ရေး လုပ်ရမယ့်ကိစ္စ မဟုတ်ပါဘူး။ ကမ္ဘာမှာ မွတ်စလင်ဦးရေ သန်း (၁၆၀၀) ကျော် ရှိပါတယ်။

၁၉၄၅ မှာ တောင်ကိုရီယား လူဦးရေရဲ့  (၂) ရာခိုင်နှုန်းဟာ ခရစ်ယာန်ဖြစ်ပြီး အများစုဟာ ဗုဒ္ဓဘာသာဝင် ဖြစ်ပါတယ်။ ၁၉၈၅ ရောက်တော့ ခရစ်ယာန်ဦးရေဟာ (၂၅) ရာခိုင်နှုန်း ဖြစ်လာပါတယ်။ ဖွံ့ဖြိုးတိုးတက်ရေးကို ကူညီတဲ့အတွက် ခရစ်ယာန်ဘာသာဝင်များလာကြောင်း သိရပါတယ်။ ၂၀၀၅ ခုနှစ် စာရင်းအရ တောင်ကိုရီးယားလူဦးရေမှာ ဘာသာကိုးကွယ်သူ (၅၄) ရာခိုင်နှုန်းသာ ရှိပါတယ်။ ဒီအထဲမှာ ဗုဒ္ဓဘာသာက (၂၃) ရာခိုင်နှုန်း၊ ခရစ်ယာန်က (၂၉) ရာခိုင်နှုန်း နဲ့ အခြားဘာသာ (၂) ရာခိုင်နှုန်း ပါဝင်ပါတယ်။ လူဦးရေ (၄၆) ရာခိုင်နှုန်းက ကိုးကွယ်ယုံကြည်တဲ့ဘာသာ မရှိတော့ပါဘူး။ ဘာသာရေး နဲ့ လူမှုစီးပွား တိုးတက်ဖွံ့ဖြိုးရေး ဆက်စပ်နေပုံကို တောင်ကိုရီးယားသမိုင်းက သက်သေပြနေပါတယ်။
http://burmese.voanews.com/content/news-analysis-census-and-muslim-population/1890108.html

1 comment:

Blogger said...

လေ့လာခဲ့ဘူးတဲ့အထဲကမှတ်မိတာတချို့ကိုပြောရရင် ရခိုင်ကို အိန္ဒယစကားနဲ့ Magh သို့ မဟုတ် Bengali Magh လို့ ခေါ်ပါတယ်။
ပါးရှန်းဘာသာနဲ့တော့ Namaze Arkan ဖြစ်ပြီး ဗမာလိုကတော့ Rakhine အင်္ဂလိပ်ကတော့ မူရင်းပါရှန်းအခေါ်မှာ Namaze ကိုဖြုတ်လိုက်ပြီး Arkan လို့ ဘဲတိုတိုခေါ်လိုက်ပါတယ်။ ရခိုင်ဟာ ဘီစီ ၂၆၀၀လောက် ကနေ အေဒီ ၁၈၀၀ လောက်အထိ သီးချားလွတ်လပ်တဲ့ဘုရင့်နိုင်ငံတခုဖြစ်တယ်။ ဘီစီ ၂၆၆၆ မတိုင်မီက ခုဘင်္ဂလား ဒါမှမဟုတ်အနောက်ပါကစ္စတန်
နိုင်ငံအစိတ်အပိုင်းတချို့ ရော ရခိုင်ပြည်နယ်ပါ ဟင်ဒူမင်းဆက်တွေရဲ့ နိုင်ငံဖြစ်ခဲ့တယ်။ ဒေသခံ ဘင်္ဂလီတွေရော ရခိုင်တွေပါ ဟိန်ဒူတွေဖြစ်ခဲ့ကြတယ်။ ဝေသာလီ ပြည် ဓည၀တီပြည်ခေတ်တွေမှာ ဘင်္ဂလားဒေ့်ရောရခိုင်ပါ သူ့ ထီးသူ့ နန်းတခုစီနဲ့ ကွဲသွားကြတယ်...အနော်ရထာခေတ်မှာရခိုင်ကိုသိမ်းပိုက်လိုက်ပြီးနောက် ဟင်ဒူကနေဗုဒ္ဓဘာသာအဖြစ်ပြောင်းလာကြသလို ဘင်္ဂလားင်္ဒေ့အပိုင်းက ဘင်္ဂလီတွေကတော့ အစ်စလမ်တွေုဖြစ်လာကြတယ်။
ဒီသမိုင်းကြောင်းအရဆိုရင် ဒီလူမျိုး၂မျိုးဖြတ်သန်းလာရတဲ့ဘ၀ခရီးကြမ်းကြီးဟာ သိတ်မကွာဘူး.ကူဗလေခံ မွန်ဂိုခေတ်တုန်းကလဲ ခြေမှုန်းသုတ်သင်ခံခဲ့ကြရတာပါဘဲ။.တမြေထဲမှာနှစ်ထောင်ပေါင်းများစွာပူးတွဲရှင်သန်လာကြတဲ့ ညီနောင်တွေမို့ တခါခါမှာသူတို့ ၂ဘက်လုံးရဲ့ ဘုံရန်သူတဦးတည်းကို ပူးပေါင်းခုခံခဲ့ကြတာလဲရှိသလို တကွေ့ ကွေ့ မှာတော့ အိမ်ကြက်အိုးမဲသုတ်ခံရပြီး အချင်းချင်း အပြုတ်ချကြတာတွေလဲဖြစ်တတ်တာပါဘဲ။
ခုဖြစ်နေတာတွေက ရန်သူကို ပေါင်းချတဲ့ကာလမဟုတ်ဘဲ အချင်းချင်းချဖို့  သူထေက်ငါ ရန်သူနဲ့ပူးပေါင်းဆောင်ရွက်နေတဲ့ကာလလို့ ဆိုရင်လဲ ဆိုနိုင်နေတယ်။ ခါးသီးတဲ့သင်္ခန်းစာပါ...ခုဆို သွေးမဝေးဘူးလို့ အမှန်အတိုင်းပြောလိုက်ရင်တောင် ပြောတဲ့လူကိုရန်ရှာချင်လောက်အောင် တဘက်နဲ့တဘက်မုန်းနေကြတဲ့ကာလပေါ့။သမိုင်းမျက်ခြေပြတ်လို့ ညီကိုမှန်းမသိကြတော့ရင်တောင် လူသားချင်းစာနာစိတ်လေးတွေထားပြီး အပြန်အလှန်အကျိုးပြုမှုတွေ၊ အပြန်အလှန်ဖေးမမှုတွေပြန်ပေါက်ပွားလာပါစေလို့ ဘဲ ဆန္ဒပြုပေးလိုက်တယ်...
(စောင့်ကြည့်နေမယ့် အဂ္ဂ)

Post a Comment