ဖရူဆိုတွင် ရွာသားများ တောင်ယာသို့ အလုပ်သွားလျှင် လက်မှတ် ၀ယ်ယူရ

ရေးသားသူ - ပါးရယ်
ဗုဒ္ဓဟူးနေ့, 07 ဒီဇင်ဘာလ 2011

ကရင်နီပြည် ဖရူဆိုမြို့နယ်တွင် မြန်မာအစိုးရတပ်မှ စစ်သင်တန်းကွင်း တည်ဆောက်နေ၍ ဒေသခံရွာသားများက တောင်ယာသို့ အလုပ်သွားလျှင် သွားခွင့် လက်မှတ်ကို တစောင် ၁၀၀၀ ကျပ်ဖြင့် အစိုးရတပ်ထံ ၀ယ်ယူကြရသည်။

အစိုးရတပ်သည် ဖရူဆိုမြို့နယ် မာခရိုရှေး၊ လောဂျာနှင့် ဒေါလောခူ ကျေးရွာတို့ အကြားတွင် အမှတ် ၁၄ တပ်မတော်တန်းမြင့် စစ်လေ့ကျင့်ရေးကွင်းကို တည်ဆောက်နေပြီး လုံခြုံရေးအတွက် စိုးရိမ်သောကြောင့် ထိုဒေသရှိ ကျေးရွာများမှ ရွာသားများအား ပြီးခဲ့သည့် နိုဝင်ဘာလ ၁၈ ရက်နေ့မှ စ၍ တောင်ယာ သွားခွင့် လက်မှတ် ပြုလုပ်ခိုင်းခြင်း ဖြစ်သည်ဟု ကရင်နီ ပြည်ထဲရေးဌာနမှ ဒု-တာဝန်ခံ ဗားမားနိုင်က ပြောသည်။

၎င်းက “ကရင်နီတပ်တွေက အဲဒီဂွင်မှာ သွားလာလှုပ်ရှားနိုင်တယ်ပေါ့။ သင်တန်းကွင်း ဆောက်ဖို့အတွက် စက်တွေကို ကရင်နီတပ်တို့က ၀င်ခွဲမှာကို စိုးရိမ်တယ်ပေါ့။ နောက်ပြီး သူတို့ (စစ်တပ်) ကိုယ်တိုင် လုံခြုံရေးအတွက်လည်း လိုတယ်ပေါ့။ အဲလိုမျိုး လိုတဲ့အတွက် ပြဿနာ တခုခု ဖြစ်ရင် ဘယ်သူက တောင်ယာ သွားလဲ ဆိုတာ သူတို့ သိမှာပေါ့။ ပြဿနာ ဆိုတာက တိုက်ပွဲတို့ တခုခု ဖြစ်လာရင် အနီးစပ်ဆုံး တောင်ယာခင်း ရှိတဲ့ တောင်ယာ ပိုင်ရှင်လား၊ သွားလာလှုပ်ရှားတဲ့ လူလား သူတို့ ဖမ်းဆီးချုပ်နှောင်နိုင်တယ်ပေါ့” ဟု ပြောသည်။

ရွာသားများသည် တောင်ယာ သွားခွင့် လက်မှတ်ကို မာခရိုရှေး ကျေးရွာ၌ အခြေစိုက်ထားသော အစိုးရတပ် ခြေမြန်တပ်ရင်း (ခမရ) ၄၂၈မှ တပ်ရင်း ဗိုလ်ကြီးထံ ၀ယ်ယူရပြီး လက်မှတ် တစောင်ကို တလကြာ အသုံးပြုနိုင်သည်ဟု ဗားမားနိုင်က ပြောသည်။

စစ်သင်တန်းကွင်း တည်ဆောက်ရေးအတွက် လုံခြုံရေးကို အစိုးရတပ်က မာခရိုရှေးတွင် ခမရ ၄၂၈မှ စစ်ကြောင်း တကြောင်း၊ လောဂျာတွင် ခမရ ၅၇၅မှ စစ်ကြောင်း တကြောင်းနှင့် ဒေါလောခူတွင် ခမရ ၅၃၀မှ စစ်ကြောင်း တကြောင်း ချထားလျက်ရှိသည်။

အစိုးရ စစ်တပ်များ တိုးချဲ့လာမှုကြောင့် ရွာသားများက တောင်ယာနှင့် ယာခင်းများသို့ အလုပ်အကိုင်များ သွားရောက်လုပ်ကိုင်ရန်နှင့် အခြားနေရာများသို့ လွတ်လွတ်လပ်လပ် သွားလာရန်အတွက် ကန့်သတ်မှုများ ရှိလာသည်ဟု ဖရူဆိုမြို့နယ်မှ ဒေသခံတဦးက ပြောသည်။

“အလုပ်သွားလုပ်နေတဲ့ အချိန်မှာ အရင်တုန်းကတော့ စောစောသွား ညနေစောင်းမှ ပြန်လို့ ရတယ်ပေါ့နော်။ အခုကျတော့ စောစောသွား ညနေစောင်းမှ ပြန်လာလို့ မရတော့ဘူးပေါ့နော်။ ကြောက်သွားတယ်ပေါ့။ ဘာလို့လဲဆိုတော့ သူတို့က အဲလိုစစ်ဆေးမေးမြန်းတယ်။ အကယ်၍ ညနေစောင်းမှ ပြန်လာရင် ဒါမှမဟုတ် စောစောသွားရင် အန္တရာယ် ရှိတယ်။ သူတို့က အထင်လွဲပြီး ပစ်နိုင်တယ်။ နောက်ပြီး ဖမ်းဆီးချုပ်နှောင်ခံရနိုင်တယ်” ဟု ၎င်းက ပြောသည်။

ကျေးရွာများ အနီး၌ အစိုးရတပ်များ လာရောက်အခြေစိုက်သည့်အတွက် အမျိုးသမီးများက လိင်ပိုင်းဆိုင်ရာ စော်ကားခံရမည်ကို စိုးရိမ်ရကြောင်း ဖရူဆိုမြို့နယ်မှ ဒေသခံအမျိုးသမီးတဦးက ပြောသည်။

“သူတို့ (စစ်တပ်)က ကောင်းတာ မဟုတ်ဘူး။ သားပျိုသမီးပျိုတွေ တောင်ယာ သွားတဲ့ အချိန်မှာ ဖမ်းဆီးနှိက်စက်ခံရမှာလား၊ မတော်မရား လုပ်ခံရမှာလား၊ အိမ်ပေါ်မှာ ဟိုယူဒီယူမယ်လား အမြဲပဲ စိုးရိမ်ရတယ်” ဟု သူမက ပြောသည်။

စစ်သင်တန်းကွင်း တည်ဆောက်ရန်အတွက် အစိုးရတပ် ခမရ ၅၇၅က ဖရူဆိုမြို့နယ် မာခရိုရှေး၊ လောဂျာနှင့် ဒေါလောခူ ကျေးရွာတို့ အကြားတွင် လေးမိုင် ပတ်လည်ရှိ ရွာသားများပိုင် ခြံမြေများကို ပြီးခဲ့သည့် ဇန်န၀ါရီလက နေရာ တိုင်းတာမှုများ ပြုလုပ်ခဲ့ပြီး ဇူလိုင်လတွင် မြေကွက် ဧကပေါင်း ၂၇၀၀ ခန့်ကို သိမ်းဆည်းခဲ့သည်။

ပြီးခဲ့သည့် နှစ်များကလည်း လွိုင်ကော်မြို့မြောက်ဘက်ရှိ နွားလ၀ိုး စုစည်းကျေးရွာနှင့် ရှားတောမြို့ရှိ စုစည်းကျေးရွာတို့မှ ရွာသားများသည် တောင်ယာသို့ အလုပ်သွားလျှင် သွားခွင့် လက်မှတ်ကို အစိုးရတပ်ထံ ၀ယ်ယူကြရသည်။
http://www.ktimes.org