ondragstart="return false" onselectstart="return false"

Friday, May 3, 2013

အစိုးရနှင့် နိုင်ငံရေး ဆွေးနွေးပွဲ အတွက် WGEC ပြင်ဆင်

သတင်း - ဖြူဖြူကို

တိုင်းရင်းသားများ ပူးပေါင်း ဆောင်ရွက်ရေး အလုပ် အဖွဲ့WGEC ( Working Group for Ethnic Co-ordinating) သည် အစိုးရနှင့် နိုင်ငံရေး အရ တွေ့ဆုံ ဆွေးနွေးသည့် အခါ တင်ပြရမည့် အချက်များကို ကြိုတင် ပြင်ဆင်သည့် အနေဖြင့် (3) ရက်တာ ဆွေးနွေး ခဲ့ကြသည်ဟု ပြောခွင့်ရသူ ခွန်ဥက္ကာက ဆိုပါသည်။

“ အစည်းအဝေး ကိုတော့ဧပြီလ၃၀ရက်နေ့ကနေမေလ၂ရက်နေ့ထိဆွေးနွေး ဖြစ်ခဲ့ပါတယ်။ အဓိက ကတော့အစိုးရနဲ့ နိုင်ငံရေး အရဆွေးနွေးတဲ့ အခါတိုင်းရင်းသား အားလုံး အတွက် ကိုယ်စားပြုနိုင်မယ့်နိုင်ငံရေးFrame Work အခြေခံ မူဘောင်တွေကိုချမှတ်ဖို့နဲ့ အတည်ပြုအကောင်ထည် ဖော်နိုင်ဖို့ ရည်ရွယ်တဲ့ အစည်းအဝေးပါ။” ဟုဆိုပါ သည်။

ဤအစည်းအဝေးတွင် Frame Work အခြေခံ မူများကို ဆွေးနွေး ခဲ့ကြသည့် အပြင် လက်တွေ့ အကောင် အထည် ဖေါ်မည့်လုပ် ငန်းစဉ် ပိုင်းကိုပါ ဆွေးနွေး ကြပါသည်။ အစည်းအဝေးသို့ ကိုယ်စားလှယ်ပေါင်း (၄၀) ခန့် တက်ရောက်ပြီး ထိုင်းနိုင်ငံ ဇင်းမယ်မြို့ တနေရာ၌ ကျင်းပ ခဲ့ပါသည်။

WGEC သည် အစိုးရနှင့် နိုင်ငံရေးအရ ဆွေးနွေးသည့် အခါ တူညီသော အခြေခံမူများ ရရှိရန် ပြည်တွင်းပြည်ပ လက်နက်ကိုင် လမ်းစဉ်ဖြင့် တော်လှန်နေသော တိုင်းရင်းသား အဖွဲ့အစည်းများ အားလုံးနှင့် လိုက်လံ ဆွေးနွေး ခဲ့ပါသည်။ ပြီးခဲ့သည့် ဧပြီလ ၂၂ ရက်နေ့၌ ရန်ကုန်မြို့ တော်ဝင်နှင်းဆီ ခန်းမတွင် ပြည်တွင်းရှိ တိုင်းရင်းသား ပါတီ (၁၂) ဖွဲ့နှင့် တွေ့ဆုံ ဆွေးနွေး ခဲ့သလို သွေးစည်း ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) အဖွဲ့ဝင် မဟုတ်သော လက်နက်ကိုင် တိုင်းရင်းသား ပါတီများနှင့်လည်း WGEC မှ လိုက်လံ ဆွေးနွေး ခဲ့ပြီး ဖြစ်ပါသည်။

ဤသို့ကြောင့် တိုင်းရင်းသား လူမျိုးများ သဘောတူ လက်ခံသော frame work ကို ရေးဆွဲ အတည်ပြုရန် ယခု အစည်း အဝေးကို ကျင်းပခဲ့ခြင်း ဖြစ်သည်ဟု ဆိုပါသည်။ ဤWGEC အစည်းအဝေးသို့ ပြည်တွင်းမှ တိုင်းရင်းသား ကိုယ်စားလှယ် (၆) ဦးလည်း တက်ရောက် ခဲ့ကြပါသည်။

WGEC သည်သွေးစည်း ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) အဖွဲ့ဝင်များဖြင့် အခြေခံ ဖွဲ့စည်း ထားပါသည်။ သို့သော် ပြည်တွင်းပြည်ပ တိုင်းရင်းသား အဖွဲ့များနှင့် လိုက်လံ ဆွေးနွေးမှုများ အရ WGEC ကို တိုးချဲ့ ဖွဲ့စည်းသင့် မသင့်ဆုံးဖြတ်ရန်လိုအပ် လာနေကြောင်း ဆိုပါသည်။

WGEC ကို တိုးချဲ့ ဖွဲ့စည်း ရာတွင်လည်း UNFC အဖွဲ့ဝင်သက်သက် တိုးချဲ့မည်သို့မဟုတ် UNFC အဖွဲ့ဝင်မဟုတ်သောသျှမ်းပြည် ပြန်လည် ထူထောင်ရေးကောင်စီ (RCSS) အဖွဲ့အစည်းလိုမျိုး သို့မဟုတ် အခြား တိုင်းရင်းသား လက်နက်ကိုင်အဖွဲ့အစည်းများပါဝင် သင့်မသင့်ကိုဆုံးဖြတ် ခဲ့ကြသော်လည်း အသေးစိတ် အချက်အလက် များကိုမူ ထုတ်ပြန်ခွင့် မရှိသေးကြောင်း ဆိုပါသည်။

ထို့အပြင် WGEC သည် အစိုးရနှင့် ဆွေးနွေးသော နိုင်ငံရေး ဆွေးနွေးပွဲတွင်အမျိုးသမီး ကိုယ်စားလှယ်များ ပါဝင် ရမည်ဟုချမှတ် ထားသဖြင့် UNFC ၏ တဖွဲ့ချင်းစီ ကိုယ်စားလှယ်များ၌ပင်အမျိုးသမီး ကိုယ်စားလှယ် များကိုထည့်သွင်း ပေးပါရန် ဆုံးဖြတ် ခဲ့ပါသည်။

“ ဥပမာ - KNPP ကနိုင်ငံရေး သွားဆွေးနွေးမယ် ဆိုရင်သူတို့အမျိုးသမီးအဖွဲ့ကကိုယ်စားလှယ်တွေ ပါသွားတာမျိုး။ နောက် PNLO မှာဆိုရင်လည်း ပအိုဝ့် အမျိုးသမီး အဖွဲ့က ကိုယ်စားလှယ် အဖြစ်ပါသွားတာမျိုးပေါ့။ အဲဒီလိုမူတွေချထားတယ် ဆိုတေ့ာ နိုင်ငံရေး အရ တွေ့ဆုံ ဆွေးနွေး ပွဲတွေမှာ အမျိုးသမီးတွေက အနည်းဆုံးတော့ လေးပုံတစ်ပုံ ပါဖို့ပေါ့။ ရာနှုန်းအရ ပြောရရင် ၃၀ ရာခိုင်နှုန်း ပါဝင်ဖို့ပေါ့။ အဲဒီလို ချမှတ် ထားတာပါ” ဟု ဆိုပါသည်။

WGEC သည် သွေးစည်း ညီညွတ်သော တိုင်းရင်းသား လူမျိုးများ ဖယ်ဒရယ် ကောင်စီ UNFC အဖွဲ့ဝင်များနှင့် အခြေခံ ဖွဲ့ စည်းထားပြီး အစိုးရနှင့် နိုင်ငံရေးအရ ဆွေးနွေးရန် အတွက် အဓိက ရည်ရွယ် ဖွဲ့စည်း ထားပါသည်။ UNFC အဖွဲ့ဝင်များမှာ
(၁) လားဟူ ဒီမိုကရက် တစ်အစည်းအရုံး(LDU)၊ (၂) မွန်ပြည်သစ် ပါတီ (NMSP)၊ (၃) ပအို့ဝ် အမျိုးသားလွတ် မြောက်ရေး အဖွဲ့ချုပ် (PNLO)၊ (၄) ပလောင်ပြည် လွတ်မြောက်ရေး တပ်ဦးPSLF (PSLF)၊ (၅) ရှမ်းပြည် တိုးတက်ရေး ပါတီ (SSPP)၊(၆)၀အမျိုးသား အဖွဲ့ချုပ်(WNO)၊ (၇) ANC ရခိုင်ပြည် အမျိုးသား ကောင်စီ၊ (၈) ချင်းအမျိုးသား တပ်ဦး (CNF)၊ (၉) ကချင် လွတ်လပ်ရေး အဖွဲ့ (KIO)၊ (၁၀) ကရင်နီ တိုးတက်ရေး ပါတီ (KNPP) နှင့် (၁၁) ကရင်အမျိုးသား အစည်းအရုံး (KNU) တို့ ဖြစ်ကြပါသည်။

WGEC သည် အစိုးရ ငြိမ်းချမ်းရေး အဖွဲ့နှင့် နိုင်ငံရေး အရ တွေ့ဆုံ ဆွေးနွေးရန် ဤမေလ၌ မူလက စီစဉ်ထားခဲ့ သော်လည်း KIO နှင့်အစိုးရတို့ မဆွေးနွေး ရသေးသဖြင့် ဇွန်လသို့ ရွှေ့ဆိုင်း ထားပါသည်။ WGEC နှင့် အစိုးရ တို့၏ ဆွေးနွေးပွဲသည် KIO နှင့် အစိုးရတို့ ဆွေးနွေးမှု မပြေလည်မချင်း ဆက်လက် ရွှေ့ဆိုင်း နေဦးမည်ဟု UNFC အဖွဲ့ဝင် များက ဆိုပါသည်။
http://www.phophtawnews.org/burmese/index.php/news/international-news/item/271-wgec.html

No comments:

Post a Comment