အစိုးရတပ် ရိက္ခာ အသိမ်းခံရ

အောက်တိုဘာလ ၁၅ရက်။ စောခါးစူး (ကေအိုင်စီ)

ကော့ကရိတ်မြို့နယ်ရှိ ဆုံဆည်းမြိုင်နှင့် အူးကလေ့ထာ့ရွာအကြား၌ အစိုးရတပ်မှ ထော်လာဂျီကား ၂စီးဖြင့် သယ်ဆောင်လာ သော တပ်ရိက္ခာကို လက်နက်ကိုင် မဟာမိတ်တပ်များက ယနေ့ နေ့လည်တွင် သိမ်းဆည်းခဲ့သည်ဟု သိရသည်။

တိုးတက်သောဗုဒ္ဓဘာသာ ကရင်အမျိုးသားတပ်မတော်-DKBA၊ ရခိုင်လွတ်မြောက်ရေးပါတီ-ALP နှင့် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး-ABSDF တို့ ပါဝင်သည့် မဟာမိတ်ပူးပေါင်းတပ်ဖွဲ့တို့က အစိုးရတပ်ဘက်မှ သယ်လာ သော ဆန်၊ ပဲနှင့် အမဲဗူးတို့ကို သိမ်းဆည်းခဲ့ခြင်း ဖြစ်သည်။

DKBA မှ ဗိုလ်မှူးစောဆန်းအောင်က “ကျနော်တို့ သိမ်းဆည်းရတဲ့အချိန်မှာ အစိုးရတပ်က စစ်သားတွေ တစ်ယောက်မှ မတွေ့ ဘူး။ ကျနော်တို့အဖွဲ့တွေ လာတာသိလို့ ထွက်ပြေးတာ ဖြစ်မယ်။ ကားထဲမှာ ပစ္စည်းအပြည့်ပဲ။”ဟု ပြောသည်။

အစိုးရတပ်မှ ၎င်းတို့ တပ်ရိက္ခာ သယ်ဆောင်လာသည့် ထော်လဂျီကားမှာ ထိုဒေသရှိ ရွာသူရွာသားများ ကားဖြစ်သည်ဟု သိရ သည်။

ရိက္ခာ သိမ်းဆည်းခံရသည့် အစိုးရတပ်မှာ တပ်မ(၂၂) လက်အောက်ခံတပ်ဖွဲ့များ ဖြစ်သည်ဟု မဟာမိတ် ပူးပေါင်းတပ်များက ပြောသည်။

တဆက်တည်းမှာပင် ကော့ကရိတ်မြို့နယ်အတွင်း တာအုထာ့ရွာဘက်မှာလည်း DKBA နှင့် အစိုးရတပ်တို့အကြား ယနေ့ ပစ် ခတ်မှု ဖြစ်ပွားခဲ့ရာ အစိုးရဘက်မှ တစ်ဦး ကျဆုံးခဲ့သည်ဟု ဗိုလ်မှူးစောဆန်းအောင်က ပြောသည်။

ကချင်အမျိုးသမီး ၇ဦး အထမ်းသမားအဖြစ် အသုံးပြုခံရ
အောက်တိုဘာလ ၁၅ရက်။ နော်ဆဲကလယ် (ကေအိုင်စီ)

ရှမ်းပြည်မြောက်ပိုင်း မူဆယ်မြို့နယ်ရှိ ခမရ(၅၂၂)တပ်ရင်းသည် မရစ်ရွာရှိ အမျိုးသမီး ၇ဦးကို အောက်တိုဘာလ ၁၂ရက်နေ့ က ဖမ်းဆီးသွားပြီး အထမ်းသမားများအဖြစ် အသုံးပြုခိုင်းစေသည်ဟု ဒေသခံ ရွာသားတစ်ဦးက ကေအိုင်စီကို ပြောသည်။

၎င်းအမျိုးသမီးများကို မွန်းလွဲ ၂နာရီခွဲတွင် မည်သည့်ဒေသဘက်သို့ ဖမ်းဆီးခေါ်ဆောင်ခဲ့မှန်း မသိသော်လည်း ထိုသူများထဲမှ မမာပွတ ၄၀နှစ်၊ မထုဆိုင် ၃၀နှစ်၊ မလွမ်ချမ် ၄၀နှစ်၊ မဘောင်ချမ်ဒဲ ၄၀နှစ်တို့မှာ ကလေး ၄ဦးမှ ၉ဦးရှိသူ မိခင်များ ဖြစ်သည်။

မြစ်ကြီးနားရှိ စစ်ကြောင့် ဒုက္ခရောက်နေသူများကို ကူညီသည့်အဖွဲ့မှ အမျိုးသမီးတစ်ဦးက “အမျိုးသားတွေက စစ်ထဲရောက် ရင်ရောက် ဒါမှမဟုတ်ရင် ရွာထဲမနေရဲတော့ အမျိုးသမီးတွေပဲ အသုံးချခံနေရပါတယ်။ ဒီကြားထဲ မုဒိမ်းမှုလိုမျိုး ဖြစ်နေတာတွေ ဟာ အဓိကတော့ စစ်ကြောင့်ပါပဲ။ တရားသောစစ်ဖြစ်ဖြစ် မတရားသောစစ်ဖြစ်ဖြစ် စစ်ဆိုတာ အများအားဖြင့် အမျိုးသားတွေ က ဖန်တီးကြတာလေ။ စစ်ဒဏ်ကို ကလေးတွေ အမျိုးသမီးတွေက ပိုခံကြရပါတယ်။”ဟု ကေအိုင်စီသို့ ပြောသည်။

ယင်းသို့ အထမ်းသမားအဖြစ် အသုံးပြုသည့် ခမရ(၅၂၂)တပ်ရင်းမှာ စကခ(၁၆) လက်အောက်ခံ ဖြစ်ပြီး ၎င်းတို့သည် ရွာထဲသို့ ၀င်ကာ ရွာသားများပိုင်ဆိုင်သည့် တရုတ်လက်ကိုင်ဖုန်းများကိုလည်း လိုက်လံသိမ်းဆည်းသည့်အပြင် မြင်း ၄ကောင်ကိုလည်း ၀န်တင်ရန်အတွက် ဖမ်းဆီးသွားကြောင်း သိရသည်။

ဒေသခံတစ်ဦးက “ရွာသူရွာသားတွေကို အတင်းခိုင်းတာ။ တိုက်ပွဲတွေထဲခေါ်သွားပြီး လူသားဒိုင်း ခဏခဏ လုပ်တယ်။”ဟု ပြောသည်။

ထို့အပြင် အစိုးရစစ်တပ်၏ တပ်မ(၉၉) လက်အောက်ခံတပ်များက ရှမ်းပြည်မြောက်ပိုင်း ကွတ်ခိုင်မြို့နယ်အတွင်း KIA တပ်ရင်း (၈)အနီးရှိ နမ့်ဆုတ်ကျေးရွာသို့ ပြီးခဲ့သည့် စက်တင်ဘာလ ၂၉ရက်နေ့က ၀င်ရောက်၍ ဈေးဆိုင်များမှ ပစ္စည်းများကို လုယက် ယူဆောင်သွားခဲ့သဖြင့် ရွာသားများမှာ ယခုအချိန်ထိ ထွက်ပြေးနေရသည်။

နမ့်ဆုတ်ရွာသား ဦးအတောင်က “အားလုံးပေါင်း စစ်သားတစ်ရာလောက် ရှိမယ်။ ဆိုင်တွေထဲတော့ ၁၀ယောက်လောက်က ၀င်တာ။ သူတို့ကြိုက်တာတွေ ယူသွားတာဗျ။ မကြိုက်တာတွေကိုလည်း လွှင့်ပစ်ခဲ့ကြတာလေ။ အတင်းကိုယူတာ။ ဘယ်လို တားတား မရဘူး။ ရွာထဲမှာလည်း ယောက်ျားတွေ တစ်ယောက်မှ ရှိမနေဘူး။ ကလေးနဲ့ အမျိုးသမီးတွေပဲ ရှိတာ။”ဟုဆိုသည်။

အိမ်ရှင်မရှိသည့် အချို့အိမ်များတွင်မူ မွေးမြူထားသော ကြက်၊ ၀က်များကို ယူဆောင်သွားသည်ဟု သိရသည်။ သူက “ခုဆို ရင် ရွာမှာ လူတစ်ယောက်မှ မရှိတော့ဘူး။ ရွာကလူတွေလည်း ဘယ်ရောက်သွားကြလည်း မသိဘူး။ စခန်း(ဒုက္ခသည်)ထဲ လည်း ရောက်မလာဘူး။ ဘုရားကျောင်းလည်း ရောက်မလာဘဲ တောင်ယာထဲ သွားပုန်းနေကြတယ်။”ဟု ပြောသည်။

မြန်မာအစိုးရ စစ်တပ်သည် ရှမ်းပြည်နယ်မြောက်ပိုင်း မူဆယ်၊ ကွတ်ခိုင်၊ မန်တုံမြို့နယ်များတွင် ပြီးခဲ့သည့် စက်တင်ဘာလ ၂၄ရက်နေ့မှ စတင် ထိုးစစ်ဆင်နေသဖြင့် KIA၊ SSA/SSPP တပ်များနှင့် တိုက်ပွဲများ ပြင်းထန်စွာ ဖြစ်ပွားခဲ့သည်။