အပစ်ရပ် ကရင်နီအဖွဲ့အတွင်း နယ်ခြားစောင့်တပ် ကိစ္စ သဘောထားကွဲ

ကရင်နီပြည် လူမျိူးပေါင်းစုံ ပြည်သူ့ လွတ်မြောက်ရေးတပ်ဦး (ကလလတ) ဆိုဒါ တချိန်က ကေအဲန်ယူ ၏ ကူညီမှုဖြင့် ကေအဲန်ယူ တပ်မဟာ(၂) တွင်ခိုလှုံလှုပ်ရှားခွင့် ရ၍ အဖွဲ့ အစည်းတစ်ခုအနေဖြင့် နောက်ပိုင်းတွင် ပြန်လည်ရပ်တည်လာနိုင်ခဲ့သော အဖွဲ့ တစ်ခုဖြစ်သည်။ ဒီအတွက် ကေအဲန်ပီပီ ကရင်နီအမျိူးသားတိုးတက်ရေးပါတီက ကေအဲန်ယူကို တချိန်က သိပ်အစာမကြေခဲ့ပါ။ သို့ သော်ငြားလည်း ကေအဲန်ယူဆိုသည်မှာ စစ်အာဏာရှည်စနစ်ကို တိုက်ခိုက်သော မည်သည့်အဖွဲ့ အစည်းကိုမဆို လက်တွဲ ဖေးမကူညီ တွဲခေါ် ပြီး တော်လှန်ရေးသမားအားလုံးတို့ ၏ ကျောရိုးသဖွယ်အဖြစ်မားမားမတ်မတ်ရပ်တည်သော အဖွဲ့ အစည်းကြီးတစ်ခုဖြစ်ပါသည်။

Wednesday, 21 October 2009 16:34 ဧရာဝတီ

နယ်ခြားစောင့်တပ် အသွင် ပြောင်းလဲရေးနှင့် ပတ်သက်ပြီး စစ်အစိုးရနှင့် အပစ်ခတ် ရပ်စဲထားသော ကယားပြည်နယ် အထူးဒေသ (၂) (ကလလတ) အဖွဲ့အတွင်း သဘောထား ကွဲပြားနေကြာင်း အဖွဲ့နှင့် နီးစပ်သူ တဦးက ပြောသည်။

ကရင်နီပြည် လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ) KNPLF ၏ ဥက္ကဋ္ဌ ဦးစန္ဒာနှင့် အတွင်းရေးမှူး ဗိုလ်မှူး ရွှေဝါတို့က နယ်ခြားစောင့်တပ် အသွင်ကူးပြောင်းရေးကို လက်မခံနိုင်ကြောင်း ယင်း ကလလတ နှင့် နီးစပ်သူကပြောသည်။ အလားတူ ကလလတ အဖွဲ့မှ ဗိုလ်မှူးအများစုကလည်း ၎င်း နယ်ခြား စောင့်တပ် ပြောင်းရေးကို လက်မခံနိုင်ကြောင်းသိရသည်။

ထို နယ်ခြားစောင့်တပ် အသွင်ကူးပြောင်းရေးနှင့်ပတ်သက်ပြီး ကလလတ အနေဖြင့် လာမည့်အောက်တိုဘာ လ ၂၇ ရက်နေ့ နောက်ဆုံးထား အကြောင်းပြန်ရမည် ဖြစ်ကြောင်း စစ်အစိုးရက ဖိအားပေးနေသည်။

သို့သော် ကလလတ ဒု ဥက္ကဋ္ဌ ဗိုလ်မှူးထွန်းကျော် ဦးဆောင်သောလူနည်းစုအဖွဲ့က နယ်ခြားစောင့်တပ် အသွင်ကူးပြောင်းရေးကို လက်ခံပြီး ၂၀၁၀ ရွေးကောက်ပွဲ ဝင်ရန် သဘောထားရှိနေကြောင်း အဆိုပါ ကလလတနှင့် နီးစပ်သူ ကပြောဆိုသည်။

၎င်းက“ ကလလတ အတွင်းမှာ ပြဿနာဖြစ်နေတယ်၊ အခုရက်ပိုင်း ဗိုလ်မှူးထွန်းကျော် က လူထုစည်းရုံးရေး ဆင်းနေတယ်၊ လူထုကတော့ ဒီ နယ်ခြားစောင့်တပ် အသွင်ကူး ပြောင်းရေး ကို လက်မခံနိုင်ဘူး”ဟု ဧရာဝတီ ကို ပြောသည်။

လတ်တလောအခြေအနေတွင် မြန်မာစစ်အစိုးရနှင့် ကလလတ တို့သည် ကယားပြည်နယ်ရှိ ဖားဆောင်မြို့ နှင့် ကျောက်ညှပ်မြို့ နှစ်မြို့အကြား ကားလမ်းဖောက်လုပ်ရေးနှင့် ပတ်သက်ပြီး သဘောထားတင်းမာ နေ သည် ဟုလည်း ဆိုသည်။

အဆိုပါ ကားလမ်းသည် ကရင်အမျိုးသား လွတ်မြောက်ရေး တပ်မတော် (KNLA) တပ်မဟာ ၅ ထိန်းချုပ်ရာ နယ်မြေသို့ ထိုးစစ်ဆင်ရန် လိုအပ်သည့် ရိက္ခာနှင့် လက်နက်ခဲယမ်းမီးကျောက်များ သယ်ဆောင်ရာ မဟာဗျူဟာ အရ အရေးပါသည့် လမ်းဖြစ်ကြောင်း ၎င်း က ပြောဆိုသည်။

ကလလတ အနေဖြင့် ၎င်းတို့ နယ်မြေကို အသုံးပြုပြီး KNLA ကိုထိုးစစ်ဆင်ဖို့ အတွက်လက်မခံနိုင်ကြောင်း ငြင်းဆိုထားသည်ဟု ဆိုသည်။

ကလလတ အဖွဲ့သည် ၁၉၉၄ ခုနှစ်၊ မေလတွင် စစ်အစိုးရနှင့် အပစ်အခတ်ရပ်စဲရေး သဘောတူညီခဲ့သည်။ ၁၉၇၈ ခုနှစ်တွင် ကလလတ အဖွဲ့သည် ကရင်နီ အမျိုးသားတိုးတက်ရေးပါတီ(KNPP)အဖွဲ့မှ ခွဲထွက်ခဲ့သည်။
ဧရာဝတီသတင်းမှကူးယူဖေါ်ပြသည်။