ondragstart="return false" onselectstart="return false"

Friday, March 26, 2010

NLD ဘာလဲ၊ ဘယ်လဲ

ပထမ ဦးစွာ ဆောင်းပါးပေးပို့ လာသူ ရဲရဲတွေးအား အထူးကျေးဇူးတင်ရှိပါကြောင်းပြောကြားလို ပါသည်။ ဒီနေရာ မှာ ပို့ စ်တင်သူအနေနှင့် အချပ်ပို ပြောချင်ဒါလေး ပြောပါရစေ။ ၁၉၉၀ ရွေးကောက်ပွဲတုန်းက ကရင်ပြည်နယ်အတွင်း မဲဆန္ဒ နယ် ၁၄ ခုမှာ ကရင်လူထုတွေက ကရင်ပါတီတွေကို မဲမပေးပဲ NLD ကို မဲဆန္ဒနယ် ၁၀ ခုမှာ အပြတ်အသား မဲပေး၍ ထိုဒေသေတွေမှာ NLD က ဂုဏ်ယူဝင့်ကြွားစွာ အနိုင်ရခဲ့ပါတယ်။ ဒါပေမယ့် NLD ကို မဲပေးခဲ့တဲ့ ကရင်ဒေသ တွေမှာ နအဖ စစ်ခွေးတွေရဲ့ လူ့ အခွင့်အရေးချိူးဖေါက်မှုတွေကို NLD က သိလျက်နဲ့ တလုံးတပါဒ မှ တစ်ခါမှ ရဲရဲကြီး နအဖ ကို ပြန်မပြောခဲ့ဘူး ဆိုဒါ နှစ်၂၀ အတွင်းမှာ ကျနော်တို့  ကရင်တွေ သိမြင်လာခဲ့ပါတယ်။ အထူးသဖြင့် သံတောင်မြို့ နယ်၊ ပဲခူးတိုင်း ထန်းတပင်မြို့ နယ် ကရင်ဒေသ၊ ညောင်လေးပင်ခရိုင် ကရင်ဒေသတွေမှာ NLD အနိုင်ရအောင်မဲပေးခဲ့တဲ့ အဲဒီနေရာတွေဟာ ခုချိန်မှာဆို နအဖ ရဲ့ဖိနိုပ်မှုကြောင့် ကရင်လူထုတွေ အလူးအလ်ိမ့်ခံနေရပါတယ်..ဒါတွေကို သိပါလျက်နဲ့  နအဖ ဗမာ့စစ်ခွေးတွေရဲ့ လူမဆန်တဲ့လုပ်ရပ်တွေကို ရပ်တန့် ဖို ကြေငြာချက်လေးတစ်စောင်တောင်မှ မထုတ်ပြန်နိုင်ခဲ့တဲ့ NLD ဟာခုချိန်မှာ ခင်ဗျားတို့ ဘာတွေဆက်လုပ်မလဲဆိုဒါ ကရင်လူထုတွေက စောင့်ကြည့်နေပါတယ်။ ခင်ဗျားတို့  ခြေလှမ်း တစ်ချက်မှားရင် ခင်ဗျားတို့ ကိုယ်တိုင် သမိုင်းတရားခံပြန်ဖြစ်မယ်ဆိုဒါ သတိပေးပါရစေ။

မှတ်ချက်။ ။ အထက်ပါအစိမ်းရောင် စာသားများသည် ပို့ စ်တင်သူ၏ အာဘော်သာဖြစ်သည်။

NLD ဘာလဲ၊ ဘယ်လဲ - ၂၇၊ ၀၃၊ ၂၀၁၀

စစ်အစိုးရ၏နယ်ခြားစောင့်တပ် အစီအစဉ်အား အပစ်ရပ်တိုင်းသားလက်နက်ကိုင် တပ်အချို့  လက်ခံခဲ့ကြသော်လည်း အများစုမှာလက်မခံကြပါ။ အချို့ သောအပစ်ရပ် အဖွဲ့ခေါင်းဆောင်များသည် မိမိတို့၏ကိုယ်ကျိုးစီးပွားအတွက်နယ်ခြားစောင့်တပ် အစီအစဉ်ကို လက်ခံကြပါသည်။ သို့သော် အမျိုးသားရေးရပ်တည်ချက်ရှိသော၊ အမျိုးသားအခွင့်အရေးအတွက် အမှန်တကယ် တိုက်ပွဲဝင်သော အဖွဲ့ များကမူ နယ်ခြားစောင့်တပ်ဖြစ်ရန် ငြင်းပယ်ကြပါသည်။ ခိုင်မာသော အမျိုးသားရေး ယုံကြည်မှု၊ ရပ်တည်မှုအတွက် အင်အားအဆမတန် ကြီးမားများပြားသော နအဖ စစ်တပ်၏ စစ်ဆင်တိုက်ခိုက်မည့်အလားအလာကို ခုခံရင်ဆိုင်ရန်၊ မိမိအမျိုးသားအတွက် ပေးဆပ်တိုက်ပွဲဝင်ရန် အသင့်ရှိကြပါသည်။
ထိုနည်းတူစွာပင် ယခုနှစ်တွင် ကျင်းပမည့်ရွေးကောက်ပွဲ၌ ပါတီနှင့်အဖွဲ့အစည်းတော်တော်များများက ပါဝင်မည်၊ မပါဝင်မည်ကို ပြတ်သားစွာဆုံးဖြတ်၍သဘောထားထုတ်ပြန်ကြပြီးဖြစ်သည်။

နယ်ခြားစောင့်တပ်ပြုရေး မပြုရေး၊ ရွေးကောက်ပွဲဝင်ရေး မ၀င်ရေး နှင့်ပတ်သက်၍ မိမိပါတီ၊ အဖွဲ့အစည်း၏ရပ်တည်ချက် သဘောထားများ ပြတ်သားစွာ ထုတ်ဖော် ပြသ တိုက်ပွဲဝင်နေကြချိန်ဖြစ်ပါသည်။
ယင်းသို့ ပါတီနှင့် အဖွဲ့အစည်းများက မိမိတို့ရပ်တည်ချက်နှင့် ရှေ့ ရေးပေါ်လစီများ သဲကွဲကြည်လင်စွာရှိနေချိန်တွင် အံ့သြ၊ ၀မ်းနည်းဖွယ်ကောင်းသည်ကား ပြည်သူအများ ထောက်ခံ အားပေးခဲ့သော၊ ဒီမိုကရေစီပြယုဂ် NLD ပါတီမှာ ဘာလုပ်ရမှန်းမသိ၊ တွေဝေလျက်ရှိနေပါသည်။ မိမိ၏အမျိုးသားရေး၊ နိုင်ငံရေး ရပ်တည်ချက်ကို စွန့်၍ ပါတီမှတ်ပုံတင်ကာ ရွေးကောက်ပွဲဝင်ရမလို၊ ရွှေဂုံတိုင်ကျေညာချက်ကို ခိုင်မာစွာကိုင်စွဲ၍ ရွေးကောက်ပွဲအားသပိတ်မှောက်ရမလိုနှင့် ဗျာများနေသည်။ ဗဟိုကော်မီတီခေါင်းဆောင်များကလည်း စစ်အစိုးရအလိုကျ က ရမည်လော၊ သတ္တိရှိရှိ ဆန့်ကျင်မည်လောမဆုံးဖြတ်ဝံ့၊ ဆုံးဖြတ်မပေးနိုင်ဖြစ်နေသည်။ လမ်းခွဲလေးထဲမှာ တွေဝေလမ်းပျောက်နေဆဲ၊ ငြင်းခုံနေကြဆဲ။ ဤသို့ အရေးကြီးသည့်အခြေအနေတခုအတွက် မှန်ကန် ပြတ်သားသော ရှေ့ရေး ပေါ်လစီတခုအား ပြင်ဆင်ထားခြင်း၊ ဆုံးဖြတ်ထားခြင်း မရှိခဲ့သည်မှာထင်ရှားပါသည်။
စစ်အစိုးရမှ ၄င်း၏လမ်းပြမြေပုံအတိုင်း တစိုက်မတ်မတ် လုပ်ကိုင် အကောင်အထည်ဖေါ်နေချိန်တွင် NLD မှာ အားအင်ဆုတ်ယုတ် အိပ်ပျော်နေဟန် ရှိသည်။ ယခုလို မိုးထဲလေထဲ ရဲရင့်ပြတ်သားရမည့်အချိန်တွင် ဘာလုပ်ရမှန်းမသိ၊ စစ်အစိုးရအားဆန့်ကျင်၍ မိမိပါတီ၏ မူအတိုင်းရပ်တည်ရမလို၊ မိမိပါတီရှင်သန်ရေးအတွက် စစ်အစိုးရအလိုကျ က ရတော့မလို ဖြစ်နေသည်။
လူထုဦးစိန်ဝင်းပြောသကဲ့သို့ NLD သည် နအဖ အလိုကျ တလျှောက်လုံးနေလာသည် ဟုမဆိုချင်သော်ငြား စာရေးသူ၏အမြင်တွင် NLD သည် ဤကာလတလျှောက် မိမိပါတီတည်မြဲရေးအတွက် မယုတ်မလွန် နိုင်ငံရေးကိုသာလုပ်ခဲ့ပါသည်။
၁၉၉၀ ခုနှစ် ရွေးကောက်ပွဲအနိုင်ရပြီးကတည်းက ယခုအချိန်အထိ လူထုဦးစိန်ဝင်းထောက်ပြသော ကိစ္စများအပါ အ၀င် စစ်အစိုးရ၏ တိုင်းရင်းသားနယ်မြေများအပေါ် မြေလှန်စစ်ဆင်ခြင်း၊ လူမဆန်စွာသတ်ဖြတ်ချေမှုန်းခြင်း၊ စစ်ဆင်ရာနယ်မြေတလွှား တိုင်းရင်းသူများအား နည်းဗျူဟာတရပ်အနေဖြင့် မုဒိန်းကျင့်စော်ကားခြင်းများအား မကြားမသိဟန်၊ မဆိုင်လေဟန်ဖြင့် ရေငုံနှုတ်ပိတ် နေခဲ့ပါသည်။ အကျဉ်းသားများလွှတ်ပေးရေး၊ ၉၀ ခုနှစ် ရွေးကောက်ပွဲရလဒ်အား အသိအမှတ်ပြုရေး၊ ပြည်မဒီမိုကရေစီရေးမှအပ အခြားသော တိုင်းရင်းသားများအပေါ် နိုင်ထက်စီးနင်း စစ်ဆင်သတ်ဖြတ်ခြင်း၊ မုဒိန်းကျင့်စော်ကားခြင်း၊ လူနည်းစုတို့၏ယဉ်ကျေးမှု၊ ဘာသာ၊သာသနာကို နိုင်ထက်ကလူပြုကျင့်မှုများ အပေါ် မသိ၊ မရှိသည့်အလား ဆွံ့အ၊ နားမကြား ဟန်နေခဲ့ပါသည်။
၎င်းတို့အား မျှော်လင့်အားကိုးစွာ မဲပေးခဲ့သော တိုင်းရင်းသားပြည်သူ အတွက် ရဲရင့်စွာ ရပ်တည်တိုက်ပွဲဝင်ရမည် ဖြစ်သော်လည်း မိမိပါတီ၏ရပ်တည်ရေးသည် အဓိကဖြစ်ခဲ့သည်။
နအဖ စစ်အစိုးရကတော့ ဘယ်သူ ဘာပြောပြော၊ ဘယ်သူက ဖိအားဘယ်လောက်ပေးပေး မိမိ၏လမ်းပြမြေပုံအတိုင်း အခက်အခဲမျိုးစုံကို ကျော်လွှားချီတက်နေချိန်တွင် NLD ပါတီအနေဖြင့် မိမိပါတီ၏ရပ်တည်ချက်ဖြစ်သော ရွှေဂုံတိုင်ကျေညာချက်အတိုင်း ရပ်တည်တိုက်ပွဲဝင်မည်လော၊ စစ်အစိုးရပေးသလောက် ရတာလေးယူ၍ ရွေးကောက်ပွဲဝင်မည်လော ဆိုသည်ကိုတော့ ပြည်သူများ ကစောင့်ကြည့်ရဦးမည်ဖြစ်သည်။
သို့သော် NLD အနေဖြင့် ရွေးကောက်ပွဲဝင်သည်ဖြစ်စေ မ၀င်သည်ဖြစ်စေ၊ ၄င်းပါတီ၏ရှင်သန်ရပ်တည်ရေး၊ တည်မြဲရေးသည် စစ်အစိုးရပေါ်တွင်မတည်ဘဲ ပြည်သူများ၏ လက်ခံအသိအမှတ်ပြုမှု၊ အားပေးထောက်ခံမှုအပေါ်တွင်သာ တည်မည်ဖြစ်ပါကြောင်း တင်ပြအပ်ပါသည်။

ရဲရဲတွေး

No comments:

Post a Comment